Zaýyt qaqpasynan kirgen sátten-aq munda ádettegi óndiris emes, ózgeshe úderis júrip jatqanyn baıqaısyń. Alańda úıilip turǵan saban – buryn jemshópke de jaramaı, órtenip ketetin qaldyq. Al qazir ol – bolashaq qurylys materıalynyń shıkizaty. Konveıer boıynda saban usaqtalyp, arnaıy óńdeýden ótip, prestelip jatyr. Jumysshylardyń aıtýynsha, ár kezeńi naqty eseppen, zerthanalyq talaptarǵa saı júrgiziledi.
Seh ishinde jańa shyqqan ekopanelderdi kórdik. Túsi birkelki, pishini jınaqy. Qolmen ustap kórseń, jeńil, biraq berik. Mamandar bul plıtalardyń ylǵalǵa da, otqa da tózimdi ekenin aıtady. Synaqtan ótken kórsetkishteri arnaıy zerthanalarda rastalǵan. Baǵasy da qoljetimdi – naryqtaǵy uqsas materıaldardan áldeqaıda arzan.
Zaýyt ishinde júrgende bir nárse anyq seziledi. Munda tek óndiris emes, ǵylym da jumys istep tur. Ár qurylǵynyń janynda ınjenerler men jas zertteýshiler júr. Olar parametrlerdi tekserip, jańa úlgilerdiń sapasyn baqylaýda ustaıdy. Aıtýlarynsha, bul – zerthanadan bastalyp, naqty óndiris alańyna deıin jetken tolyq sıkldi joba.
О́ndiristiń Taıynshada ornalasýy da beker emes. Aýdanda saban qory jetkilikti. Onyń ústine temirjol jelisi bar, logıstıka yńǵaıly. Daıyn ónimdi elimizdiń ár óńirine jetkizýge múmkindik mol.
Zaýytty aralap júrgende shetelden ákelinetin aǵash-jońqaly plıtalar jaıy da sóz boldy. Munda shyǵarylatyn ekopanelder tolyqtaı agrarlyq qaldyqtardan jasalady. Bul ımportqa táýeldilikti azaıtyp, jergilikti shıkizattyń qunyn arttyryp otyr.
О́ndiris iske qosylǵan kúni «jaqsyny kórmekke» dep kelgen qonaqtar kóp boldy. Oblys pen aýdan ókilderi, ǵalymdar, ınvestorlar sehty aralap, jańa jeliniń jumysyn kórdi. Kezdesýler barysynda ǵylym men óndiristiń osylaı toǵysýy óńir ekonomıkasyna jańa serpin beretini aıtyldy.
«Bul joba zamanaýı tehnologııalardy engizý men aýyl sharýashylyǵy resýrstaryn tıimdi paıdalanýdy biriktiredi. Bul – ǵylym men óndiristiń tabysty yntymaqtastyǵynyń aıqyn úlgisi. Zaýyt aýdan úshin ınnovasııalyq óndiristiń etalonyna jáne ósý núktesine aınalatynyna senimdimin», dedi Soltústik Qazaqstan oblysy ákiminiń orynbasary Qanat Dúzelbaev.
Taıynsha aýdanynyń ákimi Berik Áljanov ǵylymı ázirlemelerdi óndiristik úderisterge engizýdiń mańyzdylyǵyna toqtaldy:
«Ǵylymı ázirlemelerdi óndiriske engizý strategııalyq mánge ıe, sebebi ol zamanaýı tehnologııalar, avtomattandyrý jáne shyǵyndardy ońtaılandyrý arqyly óndiris tıimdiligin arttyrady. Sonymen qatar kásiporyndardyń básekege qabilettiligin kúsheıtip, joǵary sapaly ári ózindik quny tómen ónim shyǵarýǵa múmkindik beredi», dedi ol.
Joba jetekshisi Ásel Jeksembaevanyń aıtýynsha, bul bastama – sabandy jaı qaldyq emes, ekonomıkalyq resýrs retinde qaraýdyń naqty úlgisi. Ǵalymdar jasaǵan tehnologııa qazirdiń ózinde suranysqa ıe bolyp otyr. Aldaǵy ýaqytta óndiristi keńeıtip, basqa óńirlerde de osyndaı zaýyttar ashý josparda bar.
«Bul joba zerthanalyq zertteýlerden bastap tájirıbelik-ónerkásiptik óndiristi iske qosýǵa deıingi tolyq joldy qamtıdy jáne Ǵylym komıteti baǵdarlamasynyń «tolyq sıklin» qamtamasyz etedi. Ol Qazaqstannyń ornyqty ekonomıkalyq ósýi men básekege qabilettiligin arttyrý úshin ǵylymdy qajetsinetin óndirister men ǵylymı ázirlemelerdi kommersııalandyrýdyń mańyzdylyǵy týraly Prezıdent Joldaýymen tolyq úılesedi», dedi ǵalym.
Jobany odan ári tabysty iske asyrý jaǵdaıynda shıkizat qory bar ońtústik jáne ońtústik-shyǵys óńirlerde óndiristi keńeıtý jospary bar kórinedi.
Aıta ketý kerek, Ásel Jeksembaeva jetekshilik etetin Qurylys-tehnıkalyq ınjınırıng ortalyǵyn qurý jónindegi megajoba aıasynda 19 ǵylymı-tehnıkalyq ázirleme zerttelip jatyr. Bul iske 70 jetekshi ǵalym, ınjener jáne halyqaralyq sarapshy tartylǵan.
Zaýyttan shyqqan soń Mirjaqyp Dýlatulynyń óleńi oıǵa oraldy:«Qalǵansha jarty jańqam men seniki, paıdalan qajetińe jarasa, alash». Astyq qaldyǵyn rásýa etpeı, el ekonomıkasynyń qajetine jaratyp otyrǵan mundaı zaýyttar eldiń ár óńirine kerek-aq.
