Úkimet
Bul týraly Úkimettiń qorytyndy baspasóz konferensııasynda Oqý-aǵartý birinshi vıse-mınıstri Maıra Meldebekova málimdedi. Onyń aıtýynsha, Prezıdent tapsyrmasyna sáıkes mektepterde balalardyń qaýipsizdigi men psıhologııalyq ál-aýqatyna basymdyq berilip otyr.
Vıse-mınıstrdiń sózinshe, 2025 jylǵy 1 qyrkúıekten bastap bilim berý uıymdarynda jańa tamaqtaný standarty engizilgen. Qazirgi tańda elimizde 1,7 mıllıon oqýshy tegin tamaqpen qamtylǵan. Sonymen qatar jańa oqý jylynan bastap barlyq mektepter men kolledjderde «DosbolLike» antıbýllıngtik baǵdarlamasy jáne «Jeke qaýipsizdik» sabaqtary iske qosylǵan.
Maıra Meldebekova Memleket basshysynyń tapsyrmasymen elimizdiń 20 óńirinde psıhologııalyq qoldaý ortalyqtary ashylǵanyn da atap ótti.
«Jyl basynan beri bul ortalyqtarda 35 myń bala men ata-anaǵa psıhologııalyq kómek kórsetildi», dedi ol.
Aıta keteıik, qabyldanǵan sharalar bilim berý uıymdarynda zorlyq-zombylyqtyń aldyn alýǵa, balalardyń quqyqtaryn qorǵaýdy kúsheıtýge jáne mektepterde qolaıly ári qaýipsiz orta qalyptastyrýǵa baǵyttalǵan.
