– Biz bul baıqaýdy birneshe jyldan beri ótkizip kelemiz. Osy is-shara aıasynda kóptegen komanda úshin ınvestor jáne naryq sarapshylarymen alǵashqy dıalog bastaýǵa múmkindik berildi. Bir jaǵynan, 2025 jyly startaptar tarapynan qyzyǵýshylyq óte joǵary boldy. Oǵan 132 ótinim kelip tústi. Al fınalǵa myqty tehnologııalyq jobalar usynyldy. «Astana Hub» – kásipkerlik ekojúıeni júıeli damytyp, startaptarǵa bilim berý, ınkýbasııa jáne akselerasııa baǵdarlamalaryn halyqaralyq deńgeıde tanytýǵa jol ashady. Bizdiń mindetiz – bolashaǵy mol tehnologııalyq sheshimderdiń jahandyq naryqqa shyǵýyna qolaıly jaǵdaı jasaý, – dedi «Astana Hub» basqarýshy dırektory Valerııa Tıo.
Sonymen «Pizza Pitch- 2025» baıqaýynyń jeńimpazy «CortexAI» startapy atandy. Joba – bıostatıstıka men bıomatematıkaǵa negizdelgen. Bul donorlyq búırekti irikteýge jáne transplantattyń qabyldanbaı qalý qaýpin boljaýǵa arnalǵan jasandy ıntellekt sheshimi. Sondaı-aq klınıkalyq sheshimniń dáldigin arttyryp, transplantologııadaǵy medısınalyq kómektiń sapasyn jaqsartady. Al ekinshi oryndy – «BEST Vision Technologies» startapy ıelendi. Munda AI-assıstentter men LLM-tehnologııasyn qoldana otyryp, ónerkásiptik qaýipsizdik salasyna arnalǵan baǵdarlamalyq qamtamasyz etý men «aqyldy» kaskalar shyǵarady. Úshinshi oryn «Repetino» platformasyna buıyrdy. Bul repetıtorlardy izdeýge jáne jeke onlaın sabaqtardy tańdaýǵa arnalǵan qyzmet. Platforma «TikTok» formatyndaǵy beınejazbalar arqyly oqytýshyny jyldam tańdap beredi.
Sonymen qatar fınalǵa «AI-target 7s», «OcuWave», «qMedAI», «YerAI Mentor», «Project I Barsum», «Flyhunt.ai», «Zhancare» jáne «Argos» startaptary da qatysty. Olar JI, medısına, bilim berý, rekrýtıng, energetıka jáne qyzmetterdi sıfrlandyrý salasyndaǵy sheshimderin usynyp, ózekti salalyq jáne áleýmettik máselelerdi sheshýge baǵyttalǵan jobalaryn qorǵady.
Is-shara sońynda barlyq jeńimpaz ben qatysýshylar seriktester tarapynan baǵaly syılyqtarmen marapattaldy.
Azamat QUSAIYN
