Sýret: ru.freepik.com
- Gonkongta tennısten ATR 250 týrnıriniń jalaýy jelbiredi. Jarysty ekinshi aınalymnan bastaǵan Aleksandr Býblık álemdik reıtıngte 77 turǵan Botık Van de Zandshıýlppen kezdesip, ony 6:3, 6:3 esebimen qapy qaldyrdy. Báseke 1 saǵat 11 mınýtke sozyldy. Kelesi kezeńde Býblık ATR tiziminde 406 satyǵa jaıǵasqan qytaılyq Shan Szıýnchenmen kúsh synasady.
- Birinshi jartylaı orta salmaqta judyryqtasyp júrgen qazaqtyń tanymal kásipqoı boks sheberi Batyr Júkembaev kelesi kezdesýin 9 mamyrda Shohjahon Ergashevke (26-2, 23 KO) qarsy ótkizedi. 34 jastaǵy О́zbekstannyń ókili pancherler qataryna jatady. Osy kúnge deıin 28 ret sharshy alańǵa shyqqan ol 26 márte jeńiske jetti. 23 qarsylasyn esinen tandyrdy. Batyr Shohjahonmen túıdeı qurdas. Qandasymyz 25 jekpe-jektiń tek bireýinde ǵana utyldy. Qarsy shyqqandardy 17 ret sulatyp saldy. «All Stars Entertainment» promoýterlik kompanııasy Júkembaev pen Ergashev arasyndaǵy kezdesýdi Tashkentegi «Hýmo Arenada» uıymdastyrýdy qup kórgen eken.
- Fıde 29 naýryz ben 15 mamyr aralyǵynda Kıprde shahmattan ótetin «Úmitkerler týrnırine» kimderdiń qatysatynyn resmı túrde jarııa etti. Bul tizimde burynyraqta jazǵanymyzdaı, bizdiń Bıbisara Asaýbaevadan bólek, reseılik Aleksandra Gorıachkına men Ekaterına Lagno, qytaılyq Chjý Szıner men Tan Chjýnı jáne úndistandyq Dıvıa Deshmýkh, Hampı Konerý, Rameshbabý Vaıshalı syndy sheberler bar. Al erlerdiń saıysynda amerıkalyq Fabıano Karýana men Hıkarý Nakamýra, nıderlandtyq Anısh Gırı, germanııalyq Mattıas Blıýbaým, qytaılyq Veı I, úndistandyq Rameshbabý Pragnanandhar, reseılik Andreı Esıpenko, ózbekstandyq Javohır Sındarov óner kórsetedi. Esterińizge sala keteıik, qazirgi kezde álem chempıony ataǵy Úndistannyń dúldúli Gýkesh Dommaradjý men Qytaıdyń burymdysy Venszıýn Szıýıge tıesili. «Úmitkerler týrnırinde» dara shyqqan shahmatshy dál osy myqtylarmen aıqasyp, chempıondyq tájdi sarapqa salady.
- Qurlyqtyq hokkeı lıgasynda kúsh synasyp júrgen «Barys» Qazanǵa sapar shegip, jergilikti «Aq Baryspen» kezdesti. Osy komanda arasyndaǵy keıingi bes oıynda tatarstandyqtar jeńiske jetken edi. Bul joly da «Aq Barys» basymdyq tanytty. Olar bizdiń qaqpamyzǵa úsh gol soqsa, elordalyq oıynshylar bir ǵana shaıbamen jaýap qaıyrýǵa jarady, esep – 3:1.
- Aralas jekpe-jek sheberi Baǵlan Jaqansha Ońtústik Koreıada irgetasy qalanǵan «Black Sombat» promoýshenimen kelisimshartqa otyrdy. Kezinde grek-rım kúresimen aınalysyp, spor sheberi deńgeıine jetken Jaqansha sporttyq osy túrinde segiz kezdesý ótkizip, jeteýinde jeńiske jetti. Taǵy bir aıta keterlik jaıt, Baǵlannyń syńary – Qorlan Jaqansha 2019 jyly kúres túrlerinen Astanada ótken álem chempıonatynyń kúmis júldegeri.
