Is-shara barysynda qalamgerler men ádebıettanýshylar qazirgi balalar ádebıetiniń damý vektory, janrdaǵy jańa úrdister, sondaı-aq ádebıettiń mádenı jáne kreatıvti ındýstrııalarmen toǵysatyn ózekti baǵyttary jóninde pikir almasty.
Paneldik talqylaý balalar ádebıetiniń búgingi bolmysy men bolashaǵyn jańa qyrynan saralaýǵa múmkindik berdi. Kezdesý aıasynda «Balalar ádebıetiniń baǵandary» serııasymen jaryq kórgen О́tepbergen Aqypbekuly, Toqash Berdııarov, Beıbit Qoıshybaev, Serikbaı Ospanuly, Nurdáýlet Aqysh jáne Beısebaı Kirisbaıulynyń tańdaýly eńbekteri kópshilikke tanystyryldy. Sonymen qatar, «Balalar kitaphanasy» toptamasy aıasynda jaryq kórgen belgili jazýshylar Qýandyq Túmenbaı men Sáýle Dosjannyń jańa týyndylary oqyrman nazaryna usynyldy.
Jıyn barysynda Balalar men jasóspirimder ádebıeti janrlyq keńesiniń tóraǵasy Eldos Toqtarbaı sońǵy bes aıda atqarylǵan jumystar jóninde esep berip, ádebı prosesti júıeli túrde monıtorıngteý, jas avtorlardy qoldaý jáne balalar ádebıetiniń sapalyq deńgeıin arttyrýǵa baǵyttalǵan bastamalardyń negizgi nátıjeleri men aldaǵy josparlarymen bólisti.
Paneldik sessııa qazaq balalar jáne jasóspirimder ádebıetiniń rýhanı keńistigin jańǵyrtyp, dástúr men ınnovasııa toǵysyndaǵy tyń ıdeıalardy ortaǵa salǵan mazmundy mádenı dıalog alańyna aınaldy.
