Sol ókpe, sol renish áli kúnge deıin tarqaı qoımasa da, tis qaqqan hırýrg Gıppokrattyń antynan aınymady. Jo-joq, operasııa ústinde pendeshilik oı jylt etken. Týǵan-týystaryna «qoldan kelgenin istedim, ókinishti...» deı salýyna da bolar edi. Alaıda aq halatyna daq túsirgisi kelmeı, toqtaǵan júrekti qaıta lúpildetti. Keshe ǵana aıýdaı aqyryp júrgen Burqattyń qur súldesin súıretip, aýrýhanaǵa jetkizgende, Oljas aman alyp qalýy úshin baryn salǵan-dy.
1995 jyl ǵoı deımin. Besinshi synypta oqyp júrgen Oljas qysqy kanıkýlda qoıar da qoımaı atasyna erip, Bóritóbeniń arǵy betindegi qystaqqa bet alǵan. Qaıtarda kelimdi-ketimdi kólik tabylyp qalar degen úmitpen atasy da kóp oılanbaı tory qasqa bıesine mingestire salǵan. Túliktiń aldy tóldeı bastaǵan ýaqyt. Tórt-bes kún qolǵabys etse de kóp-kórim kómek.
Taý ishi yqtasyn bolǵan soń ba, etektegideı úskirik aıaz joq. Oljas atasy ekeýi kúndelikti jamyraǵan túlikke shóp salady, sýatqa túsiredi. Keıde anaý ıyqtan syrǵanaq tebedi. Qyzyqty kúnderi zýlap ótip jatty. Sabaq ýaqyty taıaǵanda ǵoı, esiktiń aldyna ÝAZ kóligi gúr etip kelip toqtaǵan. Aýyldaǵy kórshi Burqat eken. Ádetinshe pańdana túsip, jan-jaǵyna tańdana qaraǵan. Aqsaqalmen aıyrbas saýda jasasty. Júk salǵyshyna eki-úsh qap jem tıedi. Dám aýyz tı degenge qaramastan, kóligine qaıta jaıǵasqan. Kıim-keshegin jınap alyp shyqqan Oljas:
– Meni ala ketińizshi, – dep jarmasa bergeni sol edi.
– Qalaı keldiń, solaı qaıt, – dep zekip tastady Burqat.
Eshkimniń aldynda bas ıe bermeıtin atasy qulynshaǵyn qushaǵyna qysyńqyraı, ózim aparyp tastaımyn dep jubatqan. Átteń, Burqat sol joly balany ala ketkende ǵoı...
Keshkisin Oljas atasyna mingesip aýylǵa tústi. Jetkenshe eki urty búlk-búlk etip, apasy salyp bergen qurtty kemirdi. Atasy osy óńirdiń oı-qyryn mekendeıtin ań-qustar týraly áńgimesin aıtyp, saǵat jarym júretin soqpaqpen áp-sátte jetti. Jıen nemeresin jetkize sala, aıdyń jaryǵy adastyrmaıdy dep, keri qaıtqan. Altaıdyń qoıyn-qonyshynan adaspaǵanymen, attyń tizesinen-aq keletin qandy sý qalt basqandy keshirmeıdi eken. Jıegindegi muzǵa taǵaly attyń ózi jambastaı qulaǵan. Qalt-qult etken aqsaqal jalp etip sýǵa tústi. О́zenniń qysylyp aqqan tusy bolsa kerek, kók aǵyn qańbaqtaı shaldy kók muzdyń astyna aparyp tyqqan...
Sol ókinish, sol oı Oljastyń janyn jegideı jep, eseıgenshe umytpaǵan...
