Elimiz tranzıt salasyndaǵy artyqshylyqtaryn saqtaý úshin birqatar baǵytta jumys júrgizip jatyr. Negizgi nazar júk tasymalynyń sapasyna aýdarylǵan. Qytaıdan Eýropaǵa jóneltilgen konteınerler Qazaqstan aýmaǵy arqyly orta eseppen 13-15 kúnde jetedi. Onyń shamamen 4 kúni el aýmaǵyndaǵy tranzıtke tıesili. Bul kórsetkish balama baǵyttarmen salystyrǵanda birneshe ese jyldam.
Sonymen qatar salada sıfrlandyrý úderisi júrip jatyr. Qazirgi tańda tek tasymal baǵytyn usynýmen shektelmeı, keshendi logıstıkalyq qyzmet kórsetýge kóshý kózdelgen. Osy baǵytta Shyǵys – Batys dálizi boıynsha birqatar logıstıkalyq kompanııa jumys istep jatyr, al Soltústik – Ońtústik baǵyty boıynsha seriktestermen kelissózder júrgizilýde. Sıfrlyq sheshimderdi engizý arqyly rásimder jeńildep, adamı faktor azaıtylyp keledi.
Halyqaralyq kooperasııa da tranzıtti damytýdaǵy mańyzdy baǵyttardyń biri sanalady. Qazaqstan kólik-logıstıka salasynda áriptestikke basymdyq beredi. Dálizder, habtar, termınaldar men mýltımodaldyq sheshimder eldiń tranzıttik múmkindigin arttyrýǵa baǵyttalǵan. Resmı málimetke sáıkes, kólik jáne logıstıka salasy halyqaralyq ózara is-qımyldyń mańyzdy bóligine aınalyp otyr.
«Osy turǵydan alǵanda, «Orta dáliz» strategııalyq mánge ıe baǵyt sanalady. Qytaı tarapy bul baǵytty damytýda basty seriktesterdiń biri bolyp otyr. Qazir Qytaı is júzinde Orta dálizdiń tolyq múshesine aınaldy deýge bolady. Resmı kelisimderge sáıkes, Qytaı 2029 jylǵa qaraı bul baǵyt arqyly jylyna 300 myń konteıner jóneltýdi josparlap otyr», deıdi Kólik vıse-mınıstri Jánibek Taıjanov.
Dálizdi damytý úshin elimizde ınfraqurylymdyq jobalar atqaryldy. Dostyq – Moıynty men Almaty aınalma temirjoldarynyń qurylysy aıaqtaldy. Aqtaý portynda konteınerlik hab salyndy. О́tken jyly teńiz floty úsh kememen tolyqty. Bul jumystar áli de jalǵasady.
Baǵyttyń mártebesin arttyrý maqsatynda Úkimetaralyq kelisim ázirlenip, ony bıyl qabyldaý josparlanyp otyr. Jalpy alǵanda, Orta dáliz búginde tolyqqandy kólik baǵdaryna aınaldy. 2028-2030 jyldarǵa qaraı onyń áleýeti aıtarlyqtaı arta túsedi dep kútiledi.
