Sýret: kaz.zakon.kz
Besinshi Ulttyq quryltaı otyrysy eldiń birligi men turaqty damýyna baǵyttalǵan naqty sheshimder qabyldanatyn mańyzdy alań ekenin taǵy bir márte kórsetti.
Sonymen qatar Memleket basshysy saıası jańǵyrtýdyń qısyndy jalǵasy Vıse-prezıdent ınstıtýty týraly aıtty. Vıse-prezıdent ınstıtýtyn qurý elde keıingi jyldary qalyptasqan búkil keıingi júıeniń logıkalyq aıaqtalýy ekenin málimdedi. Onyń aıtýynsha, Vıse-prezıdentti Prezıdent Parlamenttiń kelisimimen taǵaıyndaıdy.
Sonymen qatar Vıse-prezıdent Memleket basshysy aıqyndaıtyn ókilettikter aıasynda qyzmet atqarady. Atap aıtqanda, halyqaralyq forýmdarda, sheteldik memleketterdiń delegasııalarymen kelissózderde el atynan ókildik etý, Parlamentte Prezıdenttiń múddesin bildirý, otandyq jáne sheteldik qoǵamdyq-saıası, ǵylymı, mádenı-aǵartýshylyq uıymdarmen ózara is-qımyl jasaý, sondaı-aq Prezıdenttiń ózge de tapsyrmalaryn oryndaý mindetteri júkteledi.
Memleket basshysy Vıse-prezıdenttiń negizgi fýnksııalary Konstıtýsııada bekitilýge tıis ekenin atap ótti. Jańa ınstıtýtty engizý memlekettik apparatty ońtaılandyrýmen qatar júredi, onyń ishinde Memlekettik keńesshi laýazymyn joıý jáne Prezıdent Ákimshiligin reformalaý kózdeledi.
Bul rette Q.Toqaev atalǵan jańashyldyq prezıdenttik bılik ınstıtýtyn álsiretpeıtinin, kerisinshe basqarý júıesiniń ornyqtylyǵyn arttyryp, bılik ıerarhııasyna aıqyndyq engizetinin, sonymen qatar Qazaqstannyń prezıdenttik respýblıka retindegi mártebesin saqtaıtynyn atap ótti.
Memleket basshysy usynylyp otyrǵan reformalardyń jıyntyǵy – birpalataly Parlamentke (Quryltaı) kóshý, Halyq keńesin qurý jáne Vıse-prezıdent laýazymyn engizý – el damýyna qýatty serpin berip, qazirgi zamanǵy syn-qaterler jaǵdaıynda memlekettiliktiń áleýetin kúsheıtedi degen senim bildirdi.
Serik ERÝBAEV,
Májilis depýtaty
