Sýret: assembly.kz
Qazaqstan halqy Assambleıasy men Ulttyq quryltaıdyń tarıhı mıssııalarynyń tabysty júzege asqanyn atap ótý – olardyń el birligi men qoǵamdyq kelisimdi nyǵaıtýdaǵy ólsheýsiz úlesin ádil baǵalaý. Bul ınstıtýttar óz kezeńinde mańyzdy ról atqaryp, qoǵamdyq dıalogtiń berik negizin qalyptastyrdy.
Osy sabaqtastyqty saqtaı otyryp, Qazaqstannyń Halyq keńesin qurý ıdeıasy strategııalyq turǵydan óte oryndy. Jańa organ Assambleıa men Ulttyq quryltaıdyń tájirıbesin biriktire otyryp, etnostardyń, áleýmettik toptardyń, óńirlerdiń múddesin júıeli túrde bildiretin joǵary konsýltatıvtik alańǵa aınalady dep senemin.
Keńes quramynyń teńgerimdi túrde qalyptastyrylýy, óńirler men azamattyq qoǵam ınstıtýttarynyń keńinen qamtylýy – ınklıýzıvtilik pen ádiletti ókildiktiń aıqyn kórinisi. Bul óz kezeginde el táýelsizdigin, qazaq memlekettiligin nyǵaıtýǵa, qoǵamdyq kelisim men ulttyq birlikti jańa sapaly deńgeıge kóterýge qyzmet etetini anyq.
Qoryta aıtqanda, Qazaqstannyń Halyq keńesi – qoǵamdy toptastyratyn, ortaq jaýapkershilik pen ulttyq múddeni alǵa qoıatyn zamanaýı ári pármendi ınstıtýt bolatyny sózsiz.
Sherzod PÝLATOV,
Ulttyq quryltaı múshesi,
Astana qalasy ózbek etnomádenı ortalyǵynyń tóraǵasy
