Sýret: syrboyi.kz
Zaman alǵa jyljyp, tehnologııa tereńdegen saıyn qolmen jazýdan qalyp bara jatqandaımyz. Tipti búginde jazýshylardyń ózi shyǵarmalaryn kompıýter, noýtbýk, basqa da qurylǵylardyń kómegimen jazady. Ásilinde jazýshylardyń úzdik jetistikteri – sońyna qaldyrǵan kitaptary ǵana emes, qoljazbalary. Álemde ataqty jazýshylardyń qoljazba qaǵazdary qundy mura sanalady. Olardyń týyndylarynyń básin bıiktetetin de – osy qoljazbalar. Al qazirgi qalamgerlerdiń qoljazbasy bar ma? Bolsa da, saýsaqpen sanarlyqtaı ǵana.
Burynǵy jazýshylar aldymen qoıyn dápterine ne bloknotqa jazatyn. Sosyn baryp jazý máshińkesinde teretin. Al qazir qolmen jazatyndar sırek. Birden kompıýterdiń pernetaqtasyna bas qoıatyndar kóp. Kompıýtermen tergenniń bir tıimsiz tusy oı men jazý jyldamdyǵy úılespeıdi. Sonyń saldarynan oı shatasady. Kompıýterde jazylǵan shyǵarmanyń joıylyp ketý qaýpi de kóp. Al qolmen jazǵan dúnıe eshqashan joǵalmaıdy. Qanshama qalamgerdiń mýzeılerde qoljazbasynyń saqtalyp turǵany – sonyń aıǵaǵy.
Onyń ústine qolmen jazý degen bir ǵanıbet dúnıe. Sózdiń deneńnen sýyrylyp shyǵyp jatqanyn baıqaısyń. Erekshe sezimge bólenip, qaǵaz betine qalam júgirtesiń. Osylaısha, jazýdyń lázzatyn jan-tánińmen sezinesiń.
Sondaı-aq jazý – mıdyń jattyǵýy. Ol mıdy qartaıýdan saqtaıdy. Kerek aqparatty kóshirip jazý onyń este uzaq saqtalýyna kómektesedi. Al qazir qalamgerlerdiń kóbi qalamyn pernetaqtaǵa aıyrbastady. Jazýshy túgili bylaıǵy adamdar da qolmen jazǵysy kelmeıdi. Ásirese vatsap jelisinde jazyp otyrýǵa erinip,
aýdıo jibere salatyndar kóbeıdi. Bul da birtindep jazýdy umyttyryp jatyr. Balalar da qolmen jazýdan qashady. Buryn mektepterde Kórkem jazý sabaǵy ótetin. Sol arqyly balalardyń jazýy shyńdalatyn. Al búginde shyraıyn shyǵaryp jazatyndar shamaly. Oılanatyn máseleniń biri – osy.
