Mańǵystaýda aǵaly-inili qos jigit teńizge batyp ketti

AQTAÝ. 25 maýsym. Mańǵystaýda aǵaly-inili qos jigit teńizge batyp ketti. Bul týraly 24.kz telearnasyna silteme jasaǵan egemen.kz tilshisi habarlady. Qaıǵyly oqıǵa Kaspııdiń sýǵa túsýge tyıym salynǵan aımaǵynda bolǵan. Aǵaıyndy jigitter birin-biri qutqaramyn dep júrip sýǵa batyp ketken. Olardyń biri 17 jasta bolsa, ekinshisi 21 jasta eken. Qutqarý qyzmeti inisin birer saǵattan soń tapqan, al aǵasyn 15 qutqarýshy eki táýlikten beri tynbaı izdestirgenmen, tabylmaýda. Shomylý maýsymy bastalǵaly 7 adam Kaspııge batyp ketken. Alaıda, oqıǵalardyń basym bóligi  qaýipti aımaqtarda tirkelgen. «Aǵynmen alyp ketti degen boljammen úlken keme men gıdrosıkldi teńizge shyǵaryp, adamdy izdep jatyrmyz. Bul jer eki jaǵynan baǵanamen qorshalǵan. Bılbord pen taqtaıshalar qoıylǵan. Soǵan qaramastan, demalýshylar osy jerge kelip sýǵa shomylýda», – deıdi Mańǵystaý oblystyq sýda qutqarý qyzmetiniń basshysy Aıbol Jumashev. Sondyqtan tótenshe jaǵdaılar qyzmetkerleri sýǵa túsý erejeleri men qaýipsizdik sharalaryn qatań saqtaýdy eskertedi. Gúlaıym Shyntemirqyzy. Derek, sýret: egemen.kz.