ASTANA. 25 maýsym. «Ekibastuz MAES-2 stansııasy» aksıonerlik qoǵamynyń janarmaı quıý mashınısi Galına Mıhnovanyń Prezıdent Nursultan Nazarbaevqa jazǵan hatyna Elbasynyń ózi jaýap berdi. Bul týraly «QazAqparat» habarlady.
Qala turǵyny Galına Mıhnova hatynda ózi jaıly aıta kele, Memleket basshysyn kezekten tys Qazaqstan Respýblıkasynyń Prezıdenti saılaýyndaǵy jeńisimen, sondaı-aq alda kele jatqan týǵan kúnimen quttyqtady.
«Men Qazaqstanda týyp-óskenime, osy jerde turyp jatqanyma ózimdi baqytty sanaımyn. Ekibastuz MAES-inde janarmaı quıý mashınısi bolyp jumys istegenime 20 jyldan asty. Siz kóptegen jyldar boıy bizdiń Prezıdentimiz bolyp kele jatqanyńyzdy maqtan tutamyn. Sizdiń kóregen basshylyǵyńyzdyń arqasynda biz beıbitshilik pen kelisimde ómir súrip kelemiz», – dedi. Sondaı-aq, ol Memleket basshysyna degen iltıpatyn óleń joldary arqyly jetkizdi.
«Byt nashım Prezıdentom Vam svyshe sýjdeno.
I stolko let byt Lıderom ne kajdomý dano.
Ispytyvaet gordost za Kazahstan narod,
Drýjnee ı bogache stal kazahstanskıı rod!».
Al Prezıdent Nursultan Nazarbaevtyń jaýap hatyn Pavlodar oblysy ákimi apparatynyń qujat aınalymyn qamtamasyz etý jáne baqylaý bóliminiń jetekshisi Janat Hammetov Galına Mıhnovaǵa tabys etti.
Hatqa: «Qurmetti Galına Vasılevna! Hatyńyzda kórsetken jyly lebizińizge jáne meniń qyzmetime arnaǵan óleń joldaryńyz úshin rahmet aıtamyn. Ekibastuz qalasynyń jáne Siz qazir jumys istep otyrǵan stansııanyń qalyptasýy meniń qatysýymmen ótti. Bul óndiris alyptary – Qazaqstannyń maqtanyshy. О́zińizben birge jumys jasaıtyndarǵa sálemimdi jetkizip, ıgi tilegimdi qabyl alyńyz», – dep jaýap jazdy Memleket basshysy.
Talǵat Raıymbek.
Derek, sýret: «QazAqparat».
