Ońtústik Qazaqstanda UBT-dan joǵary ball jınaǵan túlek marapattaldy

ASTANA. 25 maýsym. Ońtústik Qazaqstan oblysynyń ákimi Asqar Myrzahmetov Ulttyq biryńǵaı testileýden 125 ball jınaǵan mektep bitirýshi túlekke 500 myń teńgelik sertıfıkat tabys etti. Bul týraly «QazAqparat» habarlady. Tóle bı aýdanyndaǵy mektepterdiń birinen bilim alǵan Laýra Ábdazımova oblys boıynsha 125 ball alǵan jalǵyz túlek. Ol aqshany óziniń qosymsha bilim alýyna jumsaıtynyn aıtty. «Altyn belgi» tabystaý saltanatty rásimine 608 ońtústikqazaqstandyq túlek jınaldy. Olardyń barlyǵy úzdik bilimderin rastaǵandar, bastapqyda úmitkerler sany 1084 bolǵan. Sharada aımaq basshysy Asqar Myrzahmetov: «Sender bizdiń bolashaǵymyzsyńdar. Biz durys baǵytty tańdadyq. Barlyǵymyzdyń túpki maqsatymyz - Qazaqstannyń kelesheginiń zor bolýy. Barshańa tabys, sáttilik, jarqyn bolashaq tileımin», – dedi. Sondaı-aq, oblystyq bilim berý basqarmasynyń basshysy ońtústikqazaqstandyq úshin UBT tabysty ótkenin málimdedi. Aımaqta ortasha ball 78,9-dy qurady. Onyń ishinde Kentaý qalasynyń túlekteri erekshe kórindi. Olardyń ortasha baly - 99,1. Ekinshi orynda Sozaq aýdanynyń túlekteri jaqsy nátıjege qol jetkizgen. Túlekterdiń ortasha baly – 86 bolsa, úshinshi orynda Túrkistannyń mektep bitirýshileri 85 ball jınaǵan. Shymkentte ortasha ball 81,8-di kórsetti. Al eń tómen kórsetkish (ortasha ball - 70,4 jáne tıisinshe 67,1) Saryaǵash, Saıram aýdandarynda tirkeldi. Saltanatty rásimde Maqtaaral aýdanynyń Baýyrjan Momyshuly atyndaǵy mektep-gımnazııasynyń eńbegi atap ótildi. Olardyń barlyq 35 úmitkeri úzdik bilimderin rastady. Mektep dırektory men bes áriptesi jáne úzdik nátıje kórsetken túlekter oblys ákiminiń qurmet gramotalarymen marapattaldy. Talǵat Raıymbek. Derek: «QazAqparat». Sýret: egemen.kz.