Túrkııa elimizdiń DSU-ǵa kirý boıynsha aıaqtalǵan kelissózdi oń baǵalady

ASTANA. 25 maýsym. Qazaqstannyń Túrkııadaǵy Elshiliginde elimizdiń Dúnıejúzilik saýda uıymyna (DSU) kirýi boıynsha kelissózderdiń aıaqtalýyna arnalǵan dóńgelek ústel otyrysy bolyp ótti. Oǵan «Qazaqstan dostary klýbynyń» músheleri, sonyń arasynda jetekshi strategııalyq ortalyqtardyń sarapshylary, saıası sholýshylar, Túrkııanyń qoǵamdyq-saıası, iskerlik ortalary jáne BAQ ókilderi qatysty. Bul týraly «QazAqparat» habarlady. О́z kezeginde Qazaqstan Respýblıkasynyń Túrkııadaǵy Elshisi Janseıit Túımebaev qatysýshylardy elimizdiń negizgi syrtqysaıası bastamalary, sonyń ishinde memleketimiz úshin mańyzdy tarıhı oqıǵa bolyp tabylatyn Qazaqstannyń DSU-ǵa kirýi boıynsha kelissózderdiń aıaqtalýy týraly habardar etti. Sondaı-aq, Janseıit Túımebaev: «Qazaqstannyń jahandaný orbıtasyna tartylyp, ashyq demokratııalyq qoǵamdy quryp otyrǵany, lıberaldyq ekonomıkalyq júıeni qalyptastyryp, álemniń kóptegen memleketterimen tyǵyz baılanys ornatyp otyr», – dedi. Sonymen qatar, shara barysynda Qazaqstan sheteldik ınvestorlar, sonyń arasynda túrikter úshin odan da tartymdy bolatyny aıtyldy. Ortalyq Azııa boıynsha sarapshy, saıası sholýshy Kıýrshad Zorlý Úkimeti uzaq kelissózder barysynda óz pozısııalaryn ustaı alǵan Qazaqstannyń dıplomatııalyq jeńisin joǵary baǵalap ótti. «Baýyrlas Qazaqstannyń Dúnıejúzilik saýda uıymyna kirýi sizderdiń elińizde eksportqa baǵyttalǵan bıznesti damytýdyń jańa múmkindikterin ashady. Túrkııa DSU-ǵa 1995 jyly kirdi, odan keıin el eksport kólemin arttyryp, básekelestik deńgeıi aıtarlyqtaı ósti. Múmkindikti paıdalana otyryp, baýyrlas Qazaqstan halqyn kele jatqan Astana kúnimen quttyqtaǵym keledi», - dedi Kıýrshad Zorlý. Túrki áleminiń ınjenerleri men sáýletshileri odaǵynyń tóraǵasy Ilııas Demırdjı Qazaqstannyń eleýli tabystaryn atap ótip, bizdiń elimizdiń ortalyqazııalyq aımaqtaǵy jetekshi rólin basa aıtty. Sondaı-aq ol Qazaqstannyń DSU-ǵa kirýi QR-daǵy bıznesti damytýdyń jańa satyǵa kóteretinin atap ótti. Talǵat Raıymbek. Derek, sýret: «QazAqparat».