Aqtóbe turǵyny alaıaqtyǵy úshin úshinshi ret sottaldy

AQTО́BE. 25 maýsym. Aqtóbede alaıaqtyǵy úshin eki márte abaqtyǵa otyryp shyqqan 38 jastaǵy qylmysker taǵy da temir torǵa qamaldy. Bul týraly egemen.kz tilshisi habarlady. Tergeý barysynda Dinmuhambet Ádilshinovtiń buǵan deıin alaıaqtyq jasaǵany úshin eki ret abaqtyǵa otyryp, 10 jyl jazasyn ótep shyqqany anyqtaldy. Biraq, bul oǵan sabaq bolmaǵan. Endi onyń qonys kolonııasynda júrip-aq Aqtóbedegi «Bıos» medısına ortalyǵynyń dárigerin aldap soqqany áshkerelenip otyr. Bastapqyda ol óziniń Toyota Land Cruiser markaly avtokóligin dárigerdiń zaýyttan 1995 jyly shyqqan Mitsubishi Pajero kóligine ústeme aqymen aýystyrýǵa kóndiredi. Keıin Bókenbaı batyr kóshesindegi úılerdiń birinen páter alýǵa usynys jasaıdy. Dárigerdiń 5 440 myń teńgege jýyq qarajatyn jymqyrǵan ol ýádesiniń birde-bireýin oryndamaǵan. Tergeý kezinde alaıaqtyń dárigerdiń aqshasyn óz qajettiligine jumsaǵandyǵy málim boldy. Al kólikti tanysyna qaryzyn óteý úshin berip jibergen. Budan bólek alaıaq 36 jastaǵy esepshini aldap, taqyrǵa otyrǵyzyp ketken. Tanysynyń senimine kirgen ol 3 mıllıon teńgege arzan páter alyp bermek bolady. Alaıda, kelisilgen aqshanyń teń jartysyn alǵan ol óz sózinde turmaǵan. №2 Aqtóbe qalalyq sotynyń sýdıasy Raýııa Kýstanova ony 6 jyl 6 aıǵa bas bostandyǵynan aıyrýǵa úkim shyǵardy. Alaıaqtyqtyń aqyry osylaı biteri beseneden belgili. Endi ol osynshama ýaqytyn temir tordyń ar jaǵynda ótkizetin bolady. Satybaldy Sáýirbaı. Derek: egemen.kz. Sýret: tengrinews.kz.