Elimizde osy sport túriniń qaryshtap damýyna ólsheýsiz úles qosqan ataqty bapker Mádiǵalı Qarsybekov pen Jasulan Muhambetqalıev Oral qalasyndaǵy short-trek úıirmesiniń tabaldyryǵynan attaǵan bozbalanyń boıyndaǵy erekshe qabiletti birden baıqady. Qandaı synaqqa salsa da, jas daryn tabandylyq pen jankeshtiliktiń shynaıy úlgisin kórsete bildi. Jattyǵý barysyndaǵy eńbekqorlyǵy eren boldy.
Aıbarly Abzaldyń qorjynynda Olımpııa oıyndary men álem chempıonatynyń medali ǵana joq. О́zge jarystarda san márte jeńis tuǵyryna kóterildi. Atap aıtsaq, qorjynynda Azııa oıyndarynyń tolyq júlde jıyntyǵy bar. Sondaı-aq Álem kýboginiń jeńimpazy, Dúnıejúzilik ýnıversıadanyń birneshe dúrkin júldegeri, elimizdiń 12 dúrkin chempıony degen mártebeli ataqtarǵa qol jetkizgen sańlaq. Úsh birdeı Olımpıadaǵa qatysyp, sonyń ekeýiniń ashylý saltanatynda qazaqtyń kók baıraǵyn ustap shyqty. 2014 jyly Sochıde besinshi oryn alsa, 2018 jyly Phıonchhanda altynshy satyǵa jaıǵasty. 2022 jyly Beıjińde jeńis tuǵyryna synyq súıem ǵana jetpeı, tórtinshi orynǵa turaqtady.
Abzaldyń boıynda naǵyz chempıonǵa tán qasıettiń barlyǵy bar. Ol – eńbekqor, jattyǵý zalynda shelektep ter tógýden esh tartynbaıdy. Jeńiske jetý jolynda esh aıanyp qalmaıdy. Tehnıkasy jetik, sheberligi shyńdalǵan, durys taktıka quryp, qajet kezinde shuǵyl sheshim qabyldaı alady. Mine, osy qasıetter A.Ájǵalıevti bıyl Olımpııa oıyndarynyń shyńyna jeteleýge tıis.
