Bas prokýratýra ókili Dúnıejúzilik Bank delegasııasymen kezdesti

ASTANA. 25 aqpan. Bas prokýrordyń birinshi orynbasary Iogan Merkel Dúnıejúzilik Bank delegasııasymen kezdesti. Taraptar sot tóreligi sektoryn ınstıtýsıonaldyq nyǵaıtý jobasynyń mańyzdy is-sharalarynyń júzege asyrylýyn talqylady. Bul týraaly Bas prokýratýranyń baspasóz qyzmeti habarlady. I.Merkel sot tóreliginiń múmkindikteri men tıimdiligin arttyrý, aqparattyq tehnologııalardy damytý men bıznes úshin quqyqtyq ortany jaqsartý jónindegi jumystardy jalǵastyrýǵa múddeliligin bildirdi. Kezdesýde quqyq buzýshylyqtyń júıeli profılaktıkasyn ázirleý, quqyq qorǵaý organdaryn jańǵyrtý, sonyń ishinde kadr saıasaty tujyrymdamasy boıynsha sharalardy júzege asyrý, elektrondyq bilezikterdi óndirýdi uıymdastyrý, jekeniń jáne memlekettiń seriktestigi negizinde kameralyq sıpattaǵy túzeý mekemelerin salý, «e-aıyppul» biryńǵaı aqparattyq júıesin engizý jónindegi sharalardy júzege asyrýdyń ózekti máseleleri talqylandy. Jobany júzege asyrýǵa bólingen qarajatty tıimdi paıdalaný áńgimeniń bólek taqyrybyna aınaldy. Dúnıejúzilik bank delegasııasynyń jetekshisi Amıtabh Mýherdjı jobany júzege asyrýdaǵy qazaqstandyq prokýratýranyń rólin joǵary baǵalap, qarajatty tıimdi paıdalaný máseleleri boıynsha ózara is-qımyldy jalǵastyrýǵa nıetti ekenin rastady. Taraptar bolyp ótken kezdesýdiń qalyptasqan qarym-qatynastyń odan ári damýy jolyndaǵy joǵary mańyzdylyǵyn, onyń keleshekte Qazaqstannyń jańa quqyqtyq damýyndaǵy aıtarlyqtaı nátıjelerge qol jetkizýine múmkindik beretinin atap ótti. Joldybaı Bazar. Derek, sýret: Bas prokýratýranyń baspasóz qyzmeti.