Fýtbol. Prezıdent kýbogy. Qazaqstan qola júldege talasady

ASTANA. 26 maýsym. Fýtboldan Astanada ótip jatqan 17 jasqa deıingi jasóspirimder arasyndaǵy Prezıdent Kýbogy jarysynda Qazaqstan jastary qola júldege talasatyn boldy. Atalǵan oıynda fýtbolshylarymyz Grýzııadan kelgen qurdastarymen kúsh synasady. Bul týraly egemen.kz habarlady. Qazaqstan quramasy toptyq kezeńdegi úshinshi oıyndy Tájikstanǵa qarsy ótkizdi. Kezdesý teń jaǵdaıda órbidi. Qos tarap ta júıeli oıyn órnegin kórsetýge tyrysty. Matchtyń 26-mınýtynda tájik oıynshysy Ramz Amrohonov esep ashty. Úziliske 5 mınýt qalǵan kezde alań ıeleri tarazy basyn teńestirip ketti. Mergendigimen kózge túsken – Samat Bortaı. Ekinshi taımda qarsylastar qorǵanysqa kóp kóńil bóldi. Jastarymyzǵa jarystyń júldesine talasý úshin tek jeńis qajet edi. Al qonaqtarǵa teń eseptiń ózi jetkilikti boldy. Sońǵy mınýttarda qazaq ulandary shabýyldy kúsheıtti. Sondaı sátterdiń birinde qarsylastarymyz óz aıyp alańdarynda tártip buzyp, bizdiń oıynshylar penaltı tebýge múmkindik aldy. Abyroı bolǵanda, Erhan Talasbaev 11 metrlikten múlt ketpedi. Osylaısha Qazaqstan quramasy 6 upaımen óz tobynda ekinshi oryn aldy. Al fınalda ár toptyń úzdikteri Ispanııa men Ázerbaıjan kezdesedi. Bul oıyndar búgin oınalady. Qazaqstan-Grýzııa matchy saǵat 14:00-de bastalsa, sońǵy oıyn 19:00-ge josparlanǵan. Elaman Qońyr. Derek: egemen.kz. Sýret: presidentcup.kz.