Qostanaıda jas sarbaz jumbaq jaǵdaıda qaza tapty

ASTANA. 26 maýsym. Qostanaıdaǵy áskerı bólimshede jas sarbaz jumbaq jaǵdaıda mert boldy. Ulttyq gvardııa sapyna qabyldanǵan aqtóbelik Tańatqan О́tepov belgisiz sebeptermen aqyl-esi aýytqyǵan jandardy emdeıtin mekemege jatqyzylyp, artynsha jaǵdaıy nasharlap, jansaqtaý bóliminen bir-aq shyqqan. Densaýlyǵynda min bolmaǵan jigittiń nebary 5 kúnnen soń úıine tabytpen oralýyna ata-analary áskerı bólimdegilerdi kinálap otyr. Bul týraly «QazAqparat» habarlady. Áskerge attanbas buryn Tańatqan О́tepov joǵary bilim alyp, memlekettik kiris bóliminde jumys istegen. Aıta keteıik, 22 jastaǵy jigit áskerge shaqyrtý alyp, otan aldyndaǵy boryshyn Qostanaı qalasyndaǵy áskerı bólimde óteý buıyrǵan. Alaıda, 3 kúnnen soń tepse temir úzetin jigit belgisiz sebeptermen aqyl-esi kem jandardy emdeıtin mekemege jatqyzylypty. «О́mir boıy bir ret aýrýhanaǵa jatyp, bir ekpe  alyp kórgen joq.  Sabasyna túsirý úshin doza bergen sııaqty. Jetem degenshe reanımasııaǵa jatqyzylǵan», – deıdi sarbazdyń ákesi Dúısenbaı О́tepov. Jaısyz habardy estigen Tańatqannyń ata-anasy alyp-ushyp Qostanaıǵa jetken. Alaıda jansaqtaý bólimindegi jigit es jımastan kóz jumdy. Áskerı bólimdegiler Tańatqan sapta turyp sandyraqtaǵanyn aıtqan. Degenmen jigittiń ata-anasy ulynyń ólimine áskerı bólimsheniń basshylary kináli dep otyr. «3 kúnde ne bolǵanyn bilmeımin. Kúmánimiz bar. Aparyp psıhıatrııalyq aýrýhanaǵa qamady. Botaqanym-aý. Biz jetemiz degenshe áıteýir bilgenderin istegen», – dedi marqumnyń anasy Aıman О́tepova. Qostanaılyq dárigerler sarbaz belgisiz nárseden ýlanýy múmkin degen baılamǵa kelgen. Muny kórgen ata-ana dıagnozy naqtylanbaǵan adamdy qalaısha dıspanserge jatqyzǵanyn túsinbeı otyr. Al áskerı bólimdegiler bul jaıt boıynsha túsinik berýden bas tartýda. Qazirde oqıǵa boıynsha tergeý bastalǵan. Qaıǵy jutqan ata-ana bolsa, zańger jaldap sottasýǵa ázirlenýde. Talǵat Raıymbek. Derek, sýret: «QazAqparat».