Ońtústik Qazaqstanda polıak kásipkerleri alma baǵyn ósirmekshi

ASTANA. 26 maýsym. Qazaqstannyń Polshadaǵy elshiliginiń uıymdastyrýymen Qazaqstan men Polsha memleketteri arasyndaǵy yntymaqtastyqty, saýda-ekonomıkalyq baılanysty arttyrý maqsatynda Varshava qalasynda eki eldiń bılik ókilderi, qoǵam qaıratkerleri, depýtattar men kásipkerlerdiń qatysýymen jıyn bolyp ótti. Bul týraly Túlkibas aýdany ákiminiń baspasóz qyzmetine silteme jasaǵan «QazAqparat» habarlady. Osy oraıda, eki memleket arasynda «KZ-EURO-PL» eýrazııalyq palatasy quryldy. Palatanyń quramynda mashına jasaý, agrarlyq ónerkásip, energetıka, qurylys salalary boıynsha jumys atqaratyn Polshanyń jetekshi kompanııalary jáne 70-ten astam orta kásiporyndary kirdi. Eýrazııalyq palata Qazaqstanda «KZ-EURO-PL» pılottyq baǵdarlamasyn Aqtóbe, Qaraǵandy, Almaty, Ońtústik Qazaqstan oblystary jáne Astanada iske asýyna qolǵabys kórsetedi. «KZ-EURO-PL» baǵdarlamasyn júzege asyrý sheńberinde Ońtústik Qazaqstan oblysy Túlkibas aýdanynyń ákimi «KZ-EURO-PL: Agrosady» agralyq kompanııalar konsorsıýmymen atalǵan aýdan aýmaǵynda ónimdi alma baqtaryn egý týraly memorandýmǵa qol qoıdy. Bul jobany iske asyrý boıynsha jaýapkershilik Polshanyń «ARNO» kompanııasyna júkteldi. Sonymen qatar Túlkibas aýdanynda jemis-jıdek saqtaıtyn logıstıkalyq ortalyq salý josparlanyp otyr. Atalmysh jobany iske asyrý týraly memorandýmǵa aýdan ákimi Q.Abdýalıevpen «Polfrost» kólik-logıstıkalyq kompanııasy arasynda qol qoıyldy. Talǵat Raıymbek. Derek: «QazAqparat». Sýret: 24.kz.