Dymy qalmaı janyp ketti

«Lanselot» meıramhanasynan shyqqan órt elektr jelisiniń qysqasha tuıyqtalýynan  bolýy múmkin. Bul týraly órt sóndirý qyzmeti brıfıngte habarlady. Jalpy onyń órtenip jatqany jaıly habar  órt sóndirýshilerge 16 saǵat 30 mınýtta túsken. Qyzyl jalyndy quryqtaýǵa 11 tehnıka men 30  adam jumyldyrylǵan. Mamandar aldymen  meıramhana qyzmetkerlerin qaýipsiz jerge shyǵaryp, alaýlaǵan jalynnyń kórshi úılerge jaıylyp ketpeýine nazar aýdarǵan. Oqıǵa kýágerleriniń aıtýynsha, órttiń qyzýynyń kúshtiligi sondaı, kórshi ǵımarattardyń syrty balqyp ketken. О́rt kezinde kórshi úıdiń  terezeleri synyp, dýaldy boılaı ósken qylqan japyraqty aǵashtary janǵan. – О́rt kezinde meıramhanadan bir bos, bir tolyq gaz balonyn alyp shyqtyq. Munyń ózi munda órt qaýipsizdigi saqtalmaıtynyn kórsetedi. 2012 jyly osy meıramhanany tekserý barysynda órt qaýipsizdigi saqtalmaıtyny anyqtalǵan bolatyn. Sol kezde qojaıynǵa aıyppul salynǵan-dy. Alaıda,  ol ótkenniń ashy sabaq­tarynan qorytyndy shyǵarmaǵan bolyp shyqty, deıdi órt sóndirý qyzmeti bastyǵynyń orynbasary Darhan Halmuratov. Otqa oranǵan aýmaq 700 sharshy metrdi quraıdy. Qyzyl jalyndy buǵalyqtaý1,5 saǵatqa sozylǵan. Al, ma­mandar meıramhananyń ór­te­nýi elektr jelisiniń qysqasha tuı­yq­­­t­a­lýy­nan boldy dep boljap otyr. «Lanselot» meıramhanasynyń qojaıyny Ovık Arsenıan órt shyqqan kúni qalada bolmaǵan.  Kúlge aınalǵan meıramhanasyn kórgende, qyzmetkerler men kórshileriniń amandyǵyna myń táýbe degenin aıtady. Bul bıyldyqqa tirkelgen eń iri órt oqıǵasy kórinedi. Tap sol kúni Aqtóbede 20 jerde órt bolǵan. Aýa raıynyń aptap ystyq ekenin eskersek órt qaýpi áli seıilmeıtini belgili. Sondyqtan órtti boldyrmaýda asa saqtyq kerektigi aıtpasa da túsinikti. Satybaldy SÁÝIRBAI, «Egemen Qazaqstan». Aqtóbe qalasy.