27 Naýryz, 2015

Tájikstanda Orta Azııadaǵy eń úlken teatr salynady

514 ret
kórsetildi
2 mın
oqý úshin
27-03-2015-teatr 01ASTANA. 27 naýryz. Tájikstanda Ulttyq teatrdyń qurylysy bastaldy. El prezıdenti Emomalı Rahmonov alǵashqy irgetasyn qalaǵan mádenı oshaq Orta Azııadaǵy eń úlken teatr bolady dep kútilýde. Bul týraly news-asia.ru habarlady. Prezıdenttiń baspasóz qyzmeti taratqan málimette teatr Dýshanbedegi Ulttyq mýzeıdiń qasyna salynatyny aıtylǵan. Bıiktigi 34,5 metrdi quraıtyn jańa nysan 5 qabattan turady. Odan bólek, taǵy eki jerasty qabaty bar. Kórermenderge arnalǵan úsh zal bolmaq. Eń úlkeni 2 500 adamǵa arnalǵan. Al qalǵan ekeýi 1 200 jáne 1 000 oryndyq. Teatrdyń tehnıkalyq jabdyqtary álemdik standarttarǵa tolyq jaýap beredi. Ǵımarattyń joǵarǵy qabattarynda kórme jáne qolóner buıymdaryna arnalǵan zaldar men daıyndyq bólmeleri ornalasady. Jerasty qabatynda 250 oryndyq avtoturaq pen tehnıkalyq jaılar bolady. Ulttyq teatrdyń jobasy 5 jyl boıy daıyndalǵan. Osy ýaqyt aralyǵynda tájik sáýletshileri álemdegi eń tanymal teatrlardyń dızaınymen tanysyp, zertteý jumystaryn júrgizgen. Osyǵan qarap sarapshylar jańa teatr Orta Azııadaǵy teńdesi joq mádenı nysan bolady dep baǵa berýde. Alaıda, bul jańalyqqa Tájikstan halqy asa qatty qýana qoıǵan joq. Tipti keıbir táýelsiz jýrnalıster eldiń osynshalyqty asta-tók qurylys júrgizetindeı jóni joq ekenin aıtýda. Eldegi Táýelsiz BAQ ókilderi ulttyq qaýymdastyǵynyń basshysy Nýrıddın Karshıbaev: «Shyny kerek, bul habar kóptegen tájikstandyqtyń ashý-yzasyn týdyrdy. Sebebi, bizde kúndelikti bir tilim nanǵa zar bolyp otyrǵandar bar. Mundaı iri teatrǵa dál qazir tájik halqy muqtaj emes. О́ıtkeni, bul bizdiń shama-sharqymyzǵa saı dúnıe emes», – deıdi. Sondaı-aq, ol Úkimettiń osyndaı jumysty qolǵa almastan buryn halyqtyń pikirimen sanasýy kerektigin aıtty. «Bılik kez kelgen bastamany qolǵa alarda aldymen qarapaıym halyqqa qoljetimdi bolýyn oılaýy kerek. Mıllıondaǵan qarjy jumsap Dýshanbede «Kohı Navrýz» atty saltanat saraıyn saldy. Sol jerge kirip-shyqqan qarapaıym halyqtyń qarasyn kórmeısiz. Eldiń ıgiligine salynbaǵan soń, mundaı nysandardyń quny kók tıyn. Qazir kórpege qarap kósiletin zaman», – dedi Karshıbaev. Elaman Qońyr. Derek, sýret: news-asia.ru.