Gúlnar Karımovanyń zańsyz áreketteri áshkerelendi

ASTANA. 27 naýryz. О́zbekstan prezıdentiniń qyzy Gúlnar Karımova eldiń uıaly baılanys salasyndaǵy halyqaralyq kompanııalardan kúdikti jolmen aqsha alyp otyrǵan. Bul týraly minval.az habarlady. Habarlamada kórsetilgendeı, Gúlnar Karımova О́zbekstanda buryn jumys istegen jáne qazir qyzmet kórsetip jatqan halyqaralyq uıaly baılanys kompanııalarynan 1 mlrd. AQSh dollaryn zańsyz alǵan kórinedi. G.Karımovanyń isine qatysty úsh jylǵa sozylǵan zertteý jumysynyń esebin OCCRP (korrýpsııalyq jáne uıymdasqan qylmystardy zertteý uıymy) ortalyǵynyń jetekshi sarapshysy Mıranda Patrýchıch Norvegııanyń Tonsberg qalasynda jınalǵan júzdegen jýrnalıstiń aldynda jarııalaǵan. Sarapshylardyń sózine qaraǵanda, Gúlnar Karımovanyń reseılik jáne skandınavııalyq kompanııalardan óz sybaılastary arqyly 1 mlrd.-tan astam AQSh dollaryn alǵanyn rastap beretin qujattar tabylǵan. Zertteýshiler olardy muqııat tekserip shyqqan. Zertteý nátıjeleri kórsetip bergendeı, prezıdenttiń qyzy óziniń aıtqanyna kónbegen sheteldik kompanııalardy «japtyryp tastaımyn» dep, memlekettik quzyrly oryndar arqyly qorqytyp otyrǵan. Ol sondaı-aq, álgi qurylymdardyń tabysynan úles alý maqsatynda úzildi-kesildi ári aqylǵa syıymsyz talaptar qoıǵan. Dáliregi, ol ádette uıaly baılanys salasyndaǵy iri kompanııalardan tabystarynyń 26 paıyzyn berýdi talap etken. Osyndaı qysymnan COSCOM kompanııasy О́zbekstannyń uıaly baılanys naryǵyn tastap shyqqan. Mıranda Patrýchıch: «Bizdiń qolymyzdaǵy qujattar onyń tym ashkóz ekenin ári korrýpsııalyq áreketteri múlde tereńdep ketkenin kórsetti», – deıdi. Taǵy bir aıta keter jaıt, uıaly baılanys operatorlary О́zbekstanda 3G lısenzııasyn qıyndyqsyz alý úshin jáne optıkalyq kabel men WiMAX jáne WiFi jelilerin tartýǵa ruqsat alý úshin Gúlnar Karımovanyń esep-shottaryna kúdikti tólemder arqyly júzdegen mln. dollar aýdarǵan. Qazirgi tańda Shveısarııada onyń ıeliginde dep sanalǵan Takiland ltd kompanııasynyń 800 mln. dollary men Shvesııadaǵy 30 mln.-nan astam AQSh dollary buǵattalǵan. Aıta keteıik, О́zbekstan bas prokýratýrasynyń sońǵy deregine sáıkes, Gúlnar Karımova úı qamaǵynda otyr. Joldybaı Bazar. Derek, sýret: minval.az.