Qorqynyshtan úmit basym bolǵany jón

Saýda-sattyq máselesi – ekonomıkanyń kúretamyry. Saýda-sattyq japatarmaǵaı júrgiziletin jabaıy alys-beris emes, halyqaralyq normalarǵa negizdelgen, arnaıy talaptar men erejeleri bar aýqymdy qubylys. Bul turǵyda aldymen aýyzǵa alyp, tilge tıek eterimiz  1995 jyly qurylǵan halyqaralyq saýda erejelerin lıberalızm  prınsıpterine qaraı retteıtin halyqaralyq ekonomıkalyq uıym – Dúnıe­júzilik saýda uıymy.  Negizgi maqsaty halyqaralyq saýdany damytý bolyp tabylatyn bul uıymǵa búginde álemniń aldyńǵy qatarly birneshe elderi múshe. Bizdiń elimiz Memleket bas­shysynyń bastamasymen bul uıymǵa kirý jumysyn 1996 jy­ly bastaǵan bolatyn. Bul uıymǵa múshe bolýda Qazaqstan álemdik saýda uıymynyń talaptary men normalaryna sáıkes taýar óndirý men qyzmet kórsetýdiń ishki jaǵdaılaryna ózgertýler engizý arqyly ekonomıkanyń  turaqty damýyna jaǵdaı jasaý, qazaqstandyq taýarlardyń  álemdik saýda keńistigine kirý múmkinshiligin alýyn maqsat etti.  Sondaı-aq, elimizdegi  shaǵyn jáne orta bıznestiń naryqtyq aıasy keńeıip, Eýropaǵa, Shyǵys Azııaǵa taýardy erkin ótkizip, ony satýǵa múmkindik ashylady. Qazaqstan álemdik saýdanyń elıtasyna kiredi. Elimizge syrtqy kapıtaldardyń kóptep kelýi qamtamasyz etiledi, shetel ınvestısııalarynyń kólemi artady. Qazaqstandyq taýarlar men ónimder DSU-ǵa múshe elderdiń naryǵyna qol jetkize alady. Tutynýshylardyń baǵa­sy jaǵynan arzan, tózimdilik jaǵynan sapaly taýar­larǵa qol jetkizý múmkindigi ashylady, al otandyq ónim óndirýshilerge básekelestik áseri mol bolady. Biraq, damýdy, al­dyńǵy qatarly 30 eldiń qata­ryna qosylýdy maqsat etken elimizge irgeli uıymdarǵa múshe bolýdan qorqýdyń emes, batyl enýdiń bereri mol. О́ıtkeni, bul, ıaǵnı Dúnıejúzilik saýda uıymyna múshe bolý – ýaqyt talaby. Buǵan deıin kórshimiz Qyrǵyzstan kıimderiniń qytaı, túrik taýarlarymen birge Qazaqstan naryǵyna dendeı enip, halyqtyń tutynýy taýaryna aınalǵandyǵyn kórip tańǵalatyn bolsaq, bizdiń elimizge de sapaly óz ónimderimen ózge elderdiń nazaryn aýdaryp, halyqtyń suranysyn óteıtin kezeń keldi. Bul bizdiń eldiń kásipkerlerine úlken jaýapkershilik júkteıdi. Gúlsara JOLDASBAEVA, Sh.Esenov atyndaǵy Kaspıı memlekettik tehnologııalar jáne ınjınırıng ýnıversıte­ti­niń prorektory, ekonomıka ǵylymdarynyń kandıdaty. AQTAÝ.