Almatylyqtar úshin altyn ýaqytty únemdep, joldy qysqartyp, kólik keptelisterin azaıtyp, aýany tazartýda septigi ólsheýsiz metropolıten qurylysynda mańyzdy oqıǵalar oryn alýda. Megapolıste metronyń «Máskeý» jáne «Saıran» beketterinde barlyq júıelerdi baıqap kórý jáne tekserý jumystary aıaqtalyp qaldy. Al jańa metro stansalary jolaýshylar sanyn eki ese arttyrady dep kútilýde.
Buǵan deıin de Almaty ákimi metropolıtenniń ekinshi kezegin belgilengen merziminen buryn aıaqtaýdy tapsyrǵan bolatyn. Alaıda, naqty sebeptermen ótken jyldyń jeltoqsanynda jolaýshylar tasymaldaýdy bastaıdy degen jospar keıinge shegerildi. Biraq, eń bastysy qaýipsizdik pen sapa ekeni aıan.
Osyǵan oraı, Almaty ákimi Ahmetjan Esimov metropolıtenniń «Máskeý» jáne «Saıran» atty eki jańa beketterine ınspektorlyq tekserý júrgizip, olardy paıdalanýǵa berý daıyndyǵynyń joǵary deńgeıde ekendigin atap ótti. Qazirgi kezde barlyq testilik tekserýler men ózge de saraptamalyq jumystar aıaqtalyp qaldy, qyzmetkerler shtaty anyqtalǵan.
Megapolıs basshysy jolaýshylardyń qaýipsizdik máselesine aıryqsha nazar aýdaryp, jańa beketterdiń barlyq júıelerin taǵy da bir ret jiti tekserip shyǵýdy tapsyrdy. Negizinen, barlyq toraptar men agregattardy qaıta saraptaýdan ótkizip, qosý, jiberý men retteý jumystarynyń nátıjesin baqylaý qajet ekendigin aıtty.
«Máskeý» jáne «Saıran» beketteriniń beriktigi oıdaǵydaı. Metro – spesıfıkalyq kólik, sondyqtan munda birinshi kezekte jolaýshylardyń qaýipsizdigin qamtamasyz etken jón», dep atap ótti Ahmetjan Esimov.
Megapolıs basshysy, jańadan salynǵan «Saıran» jáne «Máskeý» beketteri iske qosylsa, mamandardyń boljamy boıynsha jolaýshylar qatary eki esege artatynyn jetkizdi. Paıdalanýǵa berilgenine az ǵana ýaqyt bolǵanyna qaramastan zamanaýı jáne ekologııalyq qaýipsiz kólik qala turǵyndary men qonaqtarynyń kóńilinen shyǵyp, esh úzilissiz qyzmet kórsetýde. Mysaly, eger alǵashqy kezderi metrony táýligine 13-14 myń adam paıdalansa, qazir olardyń sany 24 myńǵa jetip otyr. О́tken jyldyń aıaǵynda tasymaldanǵan jolaýshylar sany 20 mln. adam bolǵan.
Qazirgi kezde jerasty kóliginiń uzyndyǵy 8,56 shaqyrym, «Saıran» jáne «Máskeý» beketteri iske qosylsa, onyń uzyndyǵy taǵy da 2,74 shaqyrymǵa uzaratyn bolady. Jerasty kóligi tarmaǵyn Abaı dańǵylynan batys baǵytqa Momyshuly kóshesine qaraı tartý metropolıtenniń birinshi jelisiniń ekinshi kezeginiń qurylysyn bastaǵan kezde júzege asady, onyń quramynda «Family Park» aýmaǵyna enetin «Saryarqa» beketi men Abaı dańǵyly boıymen Momyshuly kóshesiniń batysyn qamtıtyn «Dostyq» beketi bolady.
Qazirgi tańda megapolıs qala úshin metrony qalanyń batys bóligine, shet aýdandaryna qulash jaıǵyzý eń kókeıkesti máselelerdiń qatarynda, óıtkeni, metro stansalaryn uzartýdyń ózimen qosa kóptegen ózekti jáıtterdi retteýge tıgizetin kómegi ólsheýsiz.
Aınash ESALI,
«Egemen Qazaqstan».
ALMATY.
Sýretterdi túsirgen
Dáýren ISAEV.
