Medısınadaǵy alǵashqy qazaqsha saıt

Qazaq onkologııa jáne radıologııa ǵylymı-zertteý ınstıtýtynda www.asylana.kz aqparattyq portalynyń tusaý­keseri ótti. Bul sút beziniń qaterli isigine arnalǵan qazaq tilindegi alǵashqy saıt. Búgingi tańda sút bezi qaterli isigi onkologııalyq aýrýlar arasynda birinshi jáne ólim-jitim boıynsha tórtinshi orynda tur. Qazir Qazaqstanda 25 myń áıel sút bezi qaterli isigine shaldyqqandar tizimine alynǵan. Buǵan qosa, jyl saıyn 3500 áıelden sút beziniń qaterli isigi anyqtalady. Jáne bir jylda 1400 áıel osy dertten kóz jumady. Sońǵy bes jyldaǵy kórsetkish boıynsha Qazaqstandaǵy sút bezi qaterli isigine shaldyqqan áıelderdiń ómir súrý uzaqtyǵy 51,4 paıyz, ıaǵnı mundaı dertke shaldyqqan áıelderdiń tek jartysy ǵana bes jyldan artyq ómir súredi. Al, AQSh-ta bul kórsetkish – 89,2, al Ulybrıtanııada 86,6 paıyzǵa teń. Mine, bul kórsetkishterge qazaqstandyqtardyń da jetýi úshin sút beziniń qaterli isigin erte satysynda anyqtaý, emdelý kýrsyn erte bastaý áser eteri sózsiz. Osy rette «Asyl ana» jobasy turǵyndardy omyraýdyń qaterli isigi týraly aqparattandyrýda ma­ńyzdy ról atqarmaq. Dál osy maq­satpen  ashylǵan saıt qazirgi tańda 5 myńǵa jýyq oqyr­man jınap úlgerdi. Bul medısına ma­man­darynyń qazaq tilinde jasaǵan alǵashqy jobasy. Qazaq onkologııa jáne radıo­logııa ǴZI arnaıy keńes berý-dıagnostı­ka­lyq bóliminiń jetekshisi, medısına ǵylymdary­nyń doktory Alma Jyl­qaı­darovanyń aıtýynsha, munda oqyrman úshin bári bar: qaterli isikpen kúreste jeńiske jetkenderdiń qýanyshqa toly jazbasy, naýqastardyń taǵdyrly haty, júrip ótken joly, ózgelerge rýh syılap, kúresý úshin kúsh beretin oqıǵalar t.t. Ári oqyrmandar bir-birimen pikir almasa alady. Al «Asyl ana» jobasy qalaı dúnıege keldi desek, 2012 jyly Densaýlyq saqtaý mınıstrligi men «Qazaq onkologtary men radıologtary» qoǵamdyq birlestigi «Sanofı» kompanııasynyń qarjylyq qoldaýymen elimizdegi sút bezi qaterli isiginiń keń taralýyna qarsy kúresý úshin «Asyl ana» jobasyn qolǵa alǵan bolatyn. Bir aıta keterligi, «Sanofı» kompanııasy qashanda áleýmettik jobalarǵa jıi qatysyp, óz taraptarynan qoldaý kórsetip otyrady. – Ustanǵan baǵytymyz naý­qastarǵa medısınalyq qyz­met­terdiń qoljetimdi bolýyn qamtamasyz etý, – dedi Qazaq­stan­daǵy Sanofı kompanııasy túpnusqa preparattar daıyndaý departamentiniń dırektory Natalıa Jaqsybekova. – Al ol úshin bul salaǵa qatysty taraptardyń ózara áriptestik qarym-qatynas ornatýy mańyz­dy. Mine, «Asyl ana» jobasy dál osyndaı baıla­nysqa jol ashyp, naýqastar men dári­ger­ler qaýymdastyǵy, densaý­lyq saq­taý uıymdary jáne farma­sevt­ıkalyq kompanııalar arasynda kópir ornatty. Jańa saıt halyqtyń sút bezi qaterli isigi týraly saýatyn kóterip, onyń sebepteri men emdeý tásilderi, joldary jáne dıagnostıkasy týraly aqparat berýdi maqsat etedi. www.asylana.kz saıtynan oqyrman kez kelgen ýaqytta turaqty tekserilý, mastopatııa dıagnostıkasy jáne sút bezi qaterli isigin emdeý jóninde paıdaly ári tolyq aqparat taba alady. Saıtty jasaý jumystaryna onkologııa jáne radıologııa salasynyń úzdik mamandary atsalysty. Saıtty jasaýshylar bul jobanyń halyq suranysyna ıe bolyp, kez kelgen naýqastyń eń senimdi dosyna, kómekshisine aınalarynan úmitti. – Jalpy, qaterli isik týraly bilgisi keletinder kóp. Ásirese, qazaq tilinde. Sút bezi qaterli isigi týraly aqparatty bireý bilse, ekinshisi bilmeıdi. Áıelder arasynda «Sút bezi qaterli isigin túbegeıli emdeýge bola ma? Emdeý tásilderi zııan emes pe?» degen suraqtar birinshi orynda turady. Al  oqyrmandar ózderin mazalaǵan suraqtarǵa naqty jaý­ap alady. Jalpy, budan ózge de keýde qaterli isigine qatysty saýaldarǵa jaýap osy saıtta jazylǵan. Bul saıttyń turaqty oqyrmandary erte tekserilýden ótýdiń mańyzyn túsinedi. Al bul bir adamdy bolsyn qaterli isikten qutqaryp qalýǵa múmkindik beredi. Eń bastysy, sút bezi qaterli isigin alǵashqy satysynda anyqtaý adam ómirin saqtap qalý múmkindigin kóbeıtedi, – dedi Qazaq onkologııa jáne radıologııa ǴZI baspasóz ortalyǵynyń jetekshisi Áıgerim Aǵyltaeva. Sondaı-aq, tusaýkeser rási­minde ınstıtýt mamandary men ókilderi sút bezi qaterli isigi­niń skrınıngi men onkúndik nátı­jelerine toqtalyp, statıs­tıkalyq esepterimen bólisti. Qazaqstanda sút bezi qater­li isigin emdeý tegin. Al negizgi kedergi – áıelderdiń óz densaý­lyǵyna salǵyrt qarap, skrınıngten ótpeýi nemese óte kesh tekserilýi. Al ol kezde naýqasqa kómektesý múmkindigi tómendeıdi. Elimizde 2008 jyldan beri sút bezi qaterli isigin erte satysynda anyqtaý maqsatynda 50 men 60 jas aralyǵyndaǵy áıelderge arnalǵan baǵdarlama júzege asyrylyp keledi. Sonymen birge, jıynda «Sút bezi qaterli isigimen birge kúreseıik!» baǵdarlamasy aıasynda ótetin sharalar týraly aıtyldy. Gúlzeınep SÁDIRQYZY, «Egemen Qazaqstan».