Uıymshyldyq qamtamasyz etiledi

Elbasynyń 2015 jyldyń 25 aqpanyndaǵy «Qazaqstan Respýblıkasyndaǵy kezekten tys prezıdenttik saılaý ótkizý týraly» Jarlyǵyna sáıkes, Aqmola oblysy ákiminiń ókimimen saılaýshylar tizimin qalyptastyrý boıynsha oblystyq jumys toby quryldy. Oblys ákimi apparaty basshy­synyń mindetin atqarýshy Nıkolaı Polıtkın jetekshilik etetin ju­mys tobynyń alǵashqy otyrysynda saılaýdy uıymshyldyqpen ótki­zýge qatysty mańyzdy máseleler qarastyryldy. Osy oraıda, 2014 jyldan bastap oblysta «Me­kenjaılyq tirkelim», «Jeke tulǵalar» memlekettik málimetter bazasymen ıntegraldanǵan jańa «Integro» aqparattyq júıesi engizilgenin atap ótkimiz keledi. Bul júıe saılaýshylar men saılaý ýchaskeleri boıynsha engizilgen aqparattyń 100 paıyzdyq dáldigin qamtamasyz etýge múmkindik beredi. Aqmola oblystyq ákimdigi múddeli organdarmen birlesip (kóshi-qon polısııasy, halyqqa qyzmet kórsetý ortalyǵy, statıstıka jáne t.b.), saılaýshylar tizimine kún saıyn naqtylaýlar júrgizýde. Bul sharalar aǵymdaǵy jyldyń naýryz aıynyń sońyna deıin júrgiziletin bolady, odan keıin Saılaýshylar tiziminiń kúntizbelik josparyna sáıkes, 5 sáýirge deıin ákimder tıisti saılaý komıssııalaryna akt boıynsha tizimderdi usynatyn bolady. Aqmola oblysy ákiminiń aqparattyq portalynda aldaǵy saılaýǵa arnalǵan bólim ashyldy, onda saılaýshylarǵa qatysty barlyq aqparattar berilgen jáne kez kelgen saılaýshy óziniń tizimde bar-joǵy týraly nemese óz saılaý ýchaskeleriniń ornalasqan orny týraly málimetter ala alady. Oblystyq BAQ-tarda saılaýǵa qatysý, saılaýshylar tizimin tekserý jáne 828 saılaý ýchaskesiniń shek­aralary men ornalasqan oryndary týraly Ortalyq saılaý komıssııasynyń saılaýshylarǵa arnaǵan úndeýi jarııalandy. Sondaı-aq, oblystyq saılaý komıssııasynyń tóraǵasy Ádilhan Shaıahmetov qalalyq jáne aýdandyq saılaý komıssııalarynyń jetek­shilerimen semınar-keńes ótkizdi. Kezdesýde oblystyq saılaý komıssııasynyń hatshysy Gen­nadıı Glýhov, komıssııa múshesi Olga Dobychına, oblys ákim­di­giniń bólim basshysy Aıjan Saq­taǵanova naýqandy uıymdastyrý, saılaý aldy úgit-nasıhat jumys­tary, Ákimshilik kodekstegi ózgeris­ter jóninde túsinik berip, suraq­tarǵa jaýap qaıtardy. Baqbergen AMALBEK, «Egemen Qazaqstan». Aqmola oblysy.