Soltústik Qazaqstanda «Polısııa barysy» anyqtaldy

PETROPAVL. 28 aqpan. Soltústik Qazaqstan oblysyndaǵy «Jeńis» balalar jáne jasóspirimder sport mektebinde ótken qazaq kúresinen «Polısııa barysy-2015» týrnıri máresine jetti. Bul týraly oblystyq ishki ister departamentiniń baspasóz ortalyǵy habarlady. Alǵash ret uıymdastyrylǵan jarys Jeńistiń 70 jyldyǵyna arnaldy. Dodaǵa oblys ortalyǵynan, aýdandardan, qylmystyq atqarý júıesi men tótenshe jaǵdaılar jónindegi departamentterinen jáne mamandandyrylǵan kúzet basqarmasynan kelgen 34 balýan qatysty. Sheshýshi beldesýde mamandandyrylǵan kúzet basqarmasynyń kishi serjanty, grek-rım kúresinen respýblıkalyq jarystardyń jeńimpazy Azat Sháýkerov pen qylmystyq atqarý júıesiniń ókili Erjan Dáýletov kúsh synasty. Nátıjesinde, Azat qarsylasyn qapy qaldyryp, oblystyń «Polısııa barysy» atandy. Úshinshi orynǵa tótenshe jaǵdaılar jónindegi departamenttiń qyzmetkeri Erbatyr Amenkın ıe boldy. Jeńimpazdar men júldegerler baǵaly syılyqtarmen marapattaldy. Sondaı-aq, birneshe atalymdar boıynsha belsendi balýandarǵa syılyqtar tabys etildi. Mamlıýttik Murat Qojaev «Týrnırdiń eń qartań qatysýshysy» atansa, aqqaıyndyq Sansyzbaı Baızaqov «Eń úzdik sheber balýan», al Nurjan Aıtegeshov «Jeńiske degen jigeri úshin» atalymdaryna ıe boldy. Oblystyq ishki ister departamentiniń basshysy, general-maıor Berik Bilálov qazaq kúresinen óńirde alǵash sport sheberi atanǵan ardager sportshy Baýyrjan Quljanovqa  «Sport qozǵalysyn damytýdaǵy sińirgen eńbegi úshin» tósbelgisin saltanatty túrde tabys etti. О́mir Esqalı. Derek: Soltústik Qazaqstan oblystyq ishki ister departamentiniń baspasóz ortalyǵy. Sýret: prosportkz.kz.