Soltústik Qazaqstanda stýdent ózine ózi qol saldy

PETROPAVL. 2 naýryz. Soltústik Qazaqstan oblysynda 17 jastaǵy stýdent ómirmen beımezgil qoshtasty. Bul týraly oblystyq bilim basqarmasy basshysynyń orynbasary Vladımır Tkachenko habarlady. Oqıǵa Esil aýdanyna qarasty Petrovka agrarlyq-kolledjinde oryn alǵan. Arnaıy qurylǵan komıssııa birinshi kýrsta oqıtyn boıjetkenniń óliminiń sebepterin anyqtap, otbasydaǵy kıkiljiń jáne súıiktisinen aırylý saldarynan osyndaı qadamǵa barǵan degen tujyrymǵa kelgen. Mundaı áreket onyń tarapynan birneshe ret qaıtalanǵan kórinedi. Sabaq úlgeriminiń tómendep, jeke tártibiniń bosańsyǵanyna qaramastan kolledj ákimshiligi naqtyly sharalar qoldanbaǵan. Tek, talqylaýmen ǵana shektelgen. Áleýmettik pedagog, psıholog óz mindetterine saldyr-salaq qaraǵan. Marqum sheshisimen jáne ógeı ákesimen jıi janjaldasyp qalyp júrgen. Al súıiktisiniń syrt aınalýy oǵan aýyr soqqy bolyp tıip, onyń aqyry asylyp qalýǵa soqtyrǵan. Oqý ornynda áleýmettik-psıhologııalyq qyzmettiń beı-bereket uıymdastyrylýy sonshalyq, taǵy bir stýdent ózin-ózi ólimge qııa jazdaǵan. О́ńirde jasóspirimderdiń sýısıdke barý faktileri azaımaı tur. Byltyr mundaı oqıǵalar 16,7 paıyzǵa kóbeıgen. Bıyl 2 jasóspirim ajal qushsa, 4 jasóspirim ózine ózi qol salmaq bolǵan. О́mir Esqalı. Derek: Soltústik Qazaqstan oblystyq bilim basqarmasynyń baspasóz qyzmeti. Sýret: news.nur.kz.