Batys Qazaqstanda sýarmaly jerlerge qatysty jónsizdik kóp

ORAL. 2 naýryz. Batys Qazaqstan oblysynda sýarmaly jerler tıimdi paıdalanylmaýda. Bul týraly egemen.kz tilshisi habarlady. «QazSýShar» RMK Batys Qazaqstan fılıalynyń dırektory Qazybek Kenjeǵalıevtiń aıtýynsha, óńirdegi 255 myń gektar sýarmaly alqaptyń teń jartysyna jýyǵyn qalpyna keltirý qajet. Bul úshin eń aldymen tehnıkalyq-ekonomıkalyq negizdemeler men jobalaý-smetalyq qujattar jasalýy tıis. Munsyz qarajat qarastyrylmaıdy. Alaıda, bul istiń deńgeıi Oral óńirinde tómen ekeni qynjyltady. Sondaı-aq, turaqty sýarmaly jerlerdiń kólemi 55 myń gektardan aspaıdy. Munyń tek 5 myń gektary ǵana paıdalanylady. Nege? Bul saýalǵa jaýap bergen oblys ákiminiń birinshi orynbasary Arman О́teǵulov qazir bul jerler sharýalardyń qolynda ekenin aıtty. Degenmen, olardyń tarapynan enjarlyq etek alǵan. Tipti ózgesin aıtpaǵanda, sýarmaly jerge ıelik etýshiler onyń jáı-kúıin jaqsartý úshin ózderine berilgen demeýqarjyny ıgerýge de qulyqsyzdyq tanytyp keledi. Onyń kólemi 29 mıllıon teńgeni quraıdy. Tutastaı alǵanda óńirde shalǵaı aýdandardaǵy sý nysandaryn túgendeý jumystarynyń da búgingi deńgeıi máz emes. Odan bólek, apatty jaǵdaıdaǵy sý nysandaryna kúrdeli jóndeý júrgizý jumystary óz kezegin kútip tur. Qazir óńirde birinshi kezekte Oral qalasy mańynda «Jasyl beldeýdi» qurý jumystaryn jalǵastyrý jáne oblys ortalyǵymen irgeles Zelenov, Terekti aýdandaryndaǵy sýarmaly jerlerdi qalpyna keltirý qajet bolyp tur. Temir Qusaıyn. Derek: egemen.kz. Sýret: abai.kz.