Budan buryn habarlaǵanymyzdaı, bıylǵy 27 maýsym, senbi kúni Mılan qalasynda ótip jatqan EKSPO kórmesinde Qazaqstannyń ulttyq kúni resmı túrde ashyldy. Oǵan Italııaǵa qysqa merzimdik jumys saparymen kelgen Elbasy Nursultan Nazarbaev bastaǵan Qazaqstan delegasııasy qatysty. Memleket basshysy budan keıin elimizdiń «Expo Milano 2015» kórmesindegi pavılonynda bolyp, Qazaqstan-Italııa bıznes-forýmynyń jumysyna atsalysty.
Qazaqstan ulttyq kúniniń ashylý rásimi EKSPO baspasóz ortalyǵynda ótti. Osy jıynda sóılegen Elbasy Mılan kórmesiniń bas taqyryby bolyp otyrǵan «Planetany asyraý. О́mir súrýge qajetti qýat» uranynyń qazirgi tańdaǵy mańyzynyń aıryqsha zor ekenine erekshe ekpin saldy.
– Taıaýdaǵy otyz jyldyń ishinde jer betindegi azyq-túlik tutyný mólsheriniń eki esege artqaly turǵanyn eskersek, adamzat balasy úshin XXI ǵasyrdaǵy basty qaterlerdiń biri azyq-túlik qaýipsizdigin qamtamasyz etý bolatynyn paıymdaý qıyn emes. Biz buǵan osy bastan daıyn bolýymyz kerek. Al atalǵan problemany jeńý úshin osy tusta barlyq memleketterdiń birlese kúsh-jiger jumsaýlary aýadaı qajet, – dedi Qazaqstan Prezıdenti.
О́z sózinde Memleket basshysy bizdiń elimizdiń jahan júzindegi azyq-túlik qaýipsizdigin qamtamasyz etý isine qazirdiń ózinde belsene atsalysyp kele jatqanyna toqtalyp ótti.
– Bizdiń elimiz ár turǵynǵa shaqqandaǵy egistik alqabynyń kólemi jóninen Avstralııa jáne Kanada elderimen qatar aldyńǵy oryndardyń birin alady. Qazaqstannyń aýyl sharýashylyǵy jerleriniń kólemi – 215 mıllıon gektar, bul álemdik resýrstyń 4 paıyzynan astamyn quraıdy. Tabıǵı-klımattyq jaǵdaıdyń ártúrliligi men qunarly topyraq bizge Jer shary turǵyndary úshin básekege qabiletti azyq-túlik óndirýshi bolýǵa múmkindik beredi dep úmittenemiz. Qazaqstan álemdegi iri astyq eksporttaýshy elderdiń aldyńǵy ondyǵyna jáne un eksportynan birinshi bestikke kiredi. Jyl saıyn elimizden Azııa elderine 6 mıllıon tonnaǵa, Eýropalyq odaq memleketterine 2 mıllıon tonnaǵa jýyq bıdaı shyǵarylady. Jalpy, eksportymyzdyń geografııalyq aýqymy 70-ten asa eldi qamtıdy, – dedi Nursultan Nazarbaev.
Qazaqstan Prezıdenti respýblıkada «Agrobıznes-2020» baǵdarlamasyn júzege asyrý arqyly, sondaı-aq, óńdeý sektoryna jetekshi transulttyq kompanııalardy tartý jóninde mindet júkteý jolymen agrarlyq sektordyń áleýetin kúsheıtý baǵytynda birqatar maqsatty jumystar júrgizilip kele jatqanyn tilge tıek etti. Osy sózdiń syńaıynda ol Qazaqstannyń birtindep halyqaralyq qoǵamdastyqqa belsene aralasyp, álemdik naryqqa azyq-túlik jetkizýde jetekshi elder qataryna qosyla bastaǵanyna nazar aýdardy.
– Biz qazir 60 myń tonna etti eksportqa shyǵarý maqsatyn alǵa qoıyp, osy baǵytta naqty jumystar jasap jatyrmyz, – dedi Nursultan Ábishuly budan ári. – Qazaqstan qazir Qytaıdyń bastamashy bolýymen qolǵa alynyp jatqan «Jibek joly» ekonomıkalyq beldeýin qurý jobasyna qatysýda. Al jaqynda ótken Astana ekonomıkalyq forýmynda atalǵan jobany júzege asyrýdy qamtamasyz etýdiń yqpaldy sharalarynyń biri retinde Eýrazııanyń transqurlyqtyq dálizin qurý máselesi talqylandy.
Qazaqstan Prezıdenti kelesi kezekte ónimdilik qarqynyn eki esege arttyrý úshin agrarlyq sektor salasyndaǵy ǵylymı zertteýler men ázirlemelerdi memleket yntalandyryp otyrǵanyn sóz etti. Ol «Qazaqstan: múmkindikter eli» degen ataý alǵan bizdiń elimizdiń kórmedegi pavılonynda óńirlerimizdiń bıologııalyq jaǵynan áralýandyǵy, olardyń agrarlyq jáne óndiristik dástúrleri, sondaı-aq, engizilip jatqan ozyq tehnologııalary men joǵary ekologııalyq standarttary týraly aqparat usynylǵanyn atap ótti.
– Astanada 2017 jyly «Bolashaqtyń energııasy» degen taqyryppen ótetin EKSPO kórmesine aıryqsha kóńil bólinip otyr. Energetıkalyq qaýipsizdik, azyq-túlik qaýipsizdigimen qatar, halyqaralyq yntymaqtastyqtyń mańyzdy baǵytynyń biri bolyp sanalady. Mılandaǵy basqosýda bastalǵan únqatysý elderdiń, halyqaralyq uıymdar men bıznestiń arasyndaǵy ózara yqpaldastyqqa serpin beredi jáne Astanada jalǵasyn tabady dep senemin, – dedi Nursultan Nazarbaev.
Elbasy budan keıin Mılan kórmesiniń álemdegi azyq-túlik qaýipsizdigi taqyrybyna arnalǵan utymdy únqatysý alańy ǵana emes, sonymen qatar, onyń ár eldiń salt-dástúri men mádenıeti týraly bile túsýdiń jaqsy múmkindiginiń bir kórinisi bolyp tabylatynyn atap ótti.
– Qatysýshylar men qonaqtar bizdiń baıyrǵy mádenıetimizben jáne baı tarıhymyzben tanysyp, búgingi Qazaqstannyń jetistikteri men josparlary jóninde kóbirek bile alady, sondaı-aq, qazaqtyń ulttyq taǵamdarynyń san alýan máziri men biregeıligine baǵa bere alady. Bizdiń eldi jaqynyraq tanyǵan soń sizderdiń mindetti túrde 2017 jyly Qazaqstanǵa barýǵa qushtarlyqtaryńyz oıanatynyna senimdimin, – dedi Prezıdent.
Sóziniń sońynda Memleket basshysy jınalǵan jurtty Astanada ótetin aldaǵy kórmege shaqyryp, EKSPO-2015 kórmesiniń tabysty ótýine óziniń júrekjardy tilektestigin jetkizdi.
Basqosýda Italııa Aýyl sharýashylyǵy mınıstri Maýrısıo Martına da sóz aldy.
– Búgin osynda qatysyp otyrǵandardyń bárine alǵys aıtamyn. EKSPO-2015 úshin erekshe eńbek sińirgen jáne osynda pavılonyn ashqan Qazaqstanǵa kópten-kóp rahmet, – dedi ol. – Eldiń kórmedegi tabysy orasan zor, ony pavılonǵa kelýshilerdiń taýsylmas tizbegi de kórsetip otyr. Biz osy jumysty sizdermen birge atqaryp otyrǵanymyzdy maqtan tutamyz. Sondyqtan Italııa úkimeti atynan jasaǵan jumystaryńyz úshin rızashylyǵymdy bildiremin. Endi Mılan sharasynyń aıasynda úlken áleýeti kóringen jaqsy qarym-qatynastyń keleshekte de jalǵasa beretinine úmit artamyz. Biz búginde sizderdiń elderińizdiń negizgi kommersııalyq áriptesteriniń biri bolyp tabylamyz, bizderdiń kásiporyndarymyz, halyqtarymyz, ýnıversıtetterimiz arasyndaǵy qalyptasqan tyǵyz qarym-qatynasty budan da jandandyra alamyz. Sizderge 2017 jyly Astanada tabysty jumys júrgizýdi tileımin. Sizder qolǵa alyp otyrǵan bolashaqtyń energııasy boıynsha ótetin kórmeniń qazir Mılanda kóterilip otyrǵan azyq-túlik qaýipsizdigi máselesine de qatysy bar. Bul birin biri tolyqtyryp, jalǵasatyn taqyryptardyń bizdiń elderimizdi odan ári jaqyndastyra túsetinine úmit artamyn.
Budan keıin Qazaqstan Prezıdenti Nursultan Nazarbaev Italııa Premer-mınıstri Matteo Rensımen birge eki eldiń ulttyq pavılondaryn aralap kórdi. Eki el basshylary osy shara barysynda Qurmetti qonaqtar kitabyna qoltańba qaldyrdy. Osynda Qazaqstannyń pavılonyna kún saıyn orta eseppen 4,5 myń adamnan kelip turatyny jetkizildi. «Qazaqstan: múmkindikter eli» dep atalatyn pavılon jalpy aýmaǵy 3 myń sharshy metrden asady. Ol eki qabatty ǵımaratta ornalasqan.
Eki eldiń basshylary pavılonmen tanysýdy Qazaqstannyń ejelgi dáýirden bergi tarıhynan habar beretin qysqa derekti fılmdi kórýden bastady. Al negizgi zalǵa mýltımedııalyq eskalatormen kóterildi. О́tkendegi ómirden búgingi zamanǵa jetken joldyń tizbegindeı bolyp órnektelgen bul 20 sekýndtyq sapardyń saıasynda eki qaptaldaǵy aq-qara gammaly fotosýretter arasynda sóılep qoıa berip, tarıh qoınaýynda qalyp bara jatqan jaıttardan habar jetkizip úlgeredi. Budan ári naqty salalar boıynsha qurylymdyq bóliniske túsken fýtýrıstik atmosfera sıpatyndaǵy negizgi zaldar bastalady. Munda taqyryptyq jaǵynan bólingen 6 rotonda tur. Mine, osy 6 bólim elimizdiń aýyl sharýashylyǵy, mal sharýashylyǵy, sý mádenıeti, ekologııa, eginshilik salalary jónindegi eksponattar men respýblıkanyń ómirine qatysty tańǵajaıyp derekterdi jaıyp salady. Al ekspozısııalardyń barlyǵy da ınteraktıvtik jáne mýltımedıalyq tehnologııalar arqyly kórsetiledi. Tanystyrylymnyń sońynan Qazaqstannyń keshegisinen búgingi kúnine, odan EKSPO-2017-ge jetken aralyqty kókteı ótetin taǵy bir óte mándi de mazmundy fılm kórsetiledi.
Osydan keıin Nursultan Nazarbaev pen Matteo Rensı Italııa pavılonyndaǵy akt zalynda uıymdastyrylǵan Qazaqstan-Italııa bıznes-forýmyna keldi. Eki eldiń isker toptarynyń qatysýymen ótken jıynda jalpy somasy 500 mıllıon dollardy quraıtyn, aýyl sharýashylyǵy tehnıkalary óndirisine, mashına jasaý, azyq-túlik, toqyma ónimderi salalaryna, munaı sektory men qurylys jumystaryna qatysty 20 qujatqa qol qoıyldy.
Forýmda Nursultan Nazarbaev sóz sóılep, bıznes-forýmǵa qatysyp otyrǵan bıznesmenderdiń kópshiligi Qazaqstanda kópten beri jumys istep kele jatqandaryn, olardyń bizdiń elimizdegi múmkindikter men uzaq merzimdi perspektıvalardy jaqsy biletinin atap ótti.
– Biz sizderdiń ashyq suhbatqa, óńirdegi jáne álemdegi qazirgi saıası konıýnktýraǵa táýelsiz syndarly yntymaqtastyqqa degen nıetterińizdi joǵary baǵalaımyz. Álemdik ekonomıkadaǵy ahýalǵa qaramastan, biz bolashaqqa birlesken josparlar quryp otyrmyz. Olardyń kópshiligi qazirdiń ózinde tabysty júzege asyryldy jáne naqty iskerlik jobaǵa aınaldy. Osynyń bári bizdiń bir-birimizge sene otyryp, seriktes retinde jumys istegenimizdiń arqasy, – dedi Memleket basshysy.
Qazaqstan Prezıdenti eki el arasyndaǵy saýda-ekonomıkalyq jáne ınvestısııalyq yntymaqtastyq turaqty damyp kele jatqanyn aıtty.
– О́zara taýar aınalymy jyl saıyn ósip keledi, byltyr ol 17 mıllıard dollar boldy. Italııa – Qazaqstan ekonomıkasynyń iri ınvestorlarynyń biri. 2005 jyldan beri Italııadan kelgen tikeleı ınvestısııalar aǵyny 6 mıllıard dollarǵa jýyqtady. Qazirgi ýaqytta bizdiń elimizde ıtalııalyq kapıtaldyń qatysy bar 200 kásiporyn jumys isteıdi. О́zara tıimdi yntymaqtastyǵymyzdy odan ári nyǵaıtyp, ekonomıkanyń túrli salalarynda yqpaldasý múmkindikterin tabý kerek dep esepteımin, – dedi Elbasy.
О́ziniń sózinde Memleket basshysy qolaıly ınvestısııalyq ahýal qalyptastyrý bizdiń eldiń basty basymdyqtarynyń biri bolyp tabylatynyn jáne onyń solaı bolyp qala beretinin aıtyp ótti.
– Elimizde jumys isteıtin sarapshylar men ınvestorlardyń baǵalaýy boıynsha, búginde Qazaqstanda ınvestısııa úshin Ortalyq Azııadaǵy eń jaqsy jaǵdaı jasalǵan. Dúnıejúzilik bank respýblıkamyzdy ınvestısııa salý úshin eń qolaıly el ekenin moıyndady. Sonymen qatar, Qazaqstannyń halyqaralyq qaryz deńgeıi tómen, al rezervterimiz 100 mıllıard dollardan asady, – dedi Qazaqstan Prezıdenti.
Nursultan Nazarbaev elimizde ınvestorlar úshin jasalyp jatqan jaǵdaılardyń aıryqsha ekenine de kópshilik nazaryn aýdardy.
– Elimizde 10 arnaýly ekonomıkalyq aımaq bar. Osy aımaqtarda kásipkerlerge jan-jaqty qoldaý kórsetiledi. Salyq jeńildikteri qarastyrylǵan. Basymdyǵy bar salalardaǵy ınvestorlar korporatıvtik tabys salyǵyn jáne jer salyǵyn tóleýden 10 jylǵa, múlik salyǵynan 8 jylǵa bosatylǵan. Investorlarǵa salyq zańnamasynyń turaqtylyǵyna kepildik beriledi. Memleket ekonomıkanyń basymdyǵy bar salalaryndaǵy nysandardy paıdalanýǵa bergennen keıin kúrdeli shyǵystardyń 30 paıyzyn ótep berýge daıyn, – dedi Memleket basshysy.
Qazaqstan Prezıdenti respýblıkamyzdyń ashyq eńbek naryǵyn qalyptastyrýdy kózdep otyrǵanyn da aıtty.
– Investorlardyń sheteldik jumys kúshin qandaı da bir kvotasyz jáne ruqsatsyz ákelýge múmkindigi bar. Sonymen qatar, álemniń 10 eliniń ınvestorlary úshin vızasyz rejim ornatylǵan, bul tizimge Italııa da kiredi. Bıylǵy 15 shildeden bastap ınvestorlar úshin vızasyz rejimdi uzartamyz. Onyń qatary taǵy 10 el – Shveısarııa, Ispanııa, Belgııa, Vengrııa, Monako, Sıngapýr, Avstralııa, Norvegııa, Shvesııa jáne Fınlıandııa elderimen tolyǵady. Álemde ınvestorlar úshin osyndaı sharttar usynatyn memleketter kóp emes dep oılaımyn, – dedi Nursultan Nazarbaev.
Memleket basshysy Qazaqstan iskerlik ahýaldy jaqsartýǵa baǵyttalǵan ınstıtýttyq reformalardy jalǵastyryp jatqanyn atap ótti.
– Kelesi jyly Astanada Halyqaralyq qarjy ortalyǵy jumysyn bastaıdy. Investorlar úshin biz ınvestısııalyq máselelerdi sot óndirisi aǵylshyn tilinde bolatyn jáne sheteldik sýdıalardy tartatyn aǵylshyn quqyǵynyń normalaryna negizdelgen quqyqtyq retteýdi usynatyn bolamyz. Korporatıvtik jáne jeke tabys salyǵynan 10 jylǵa bosatý, sheteldik mamandardy jeńildikpen tartý máseleleri qarastyrylǵan. Qazaqstanda elimizdiń isker toptarynyń ókilderi men sheteldik kásipkerlerdiń jumysyna atsalysý úshin Prezıdent janynan Shetel ınvestorlarynyń keńesi qurylǵan. Keńes túrli máselelerdi, sonyń ishinde sheneýnikter tarapynan jasalatyn kedergilerdi, salyq problemalaryn talqylaý úshin turaqty túrde ótip turady, – dedi Qazaqstan Prezıdenti.
Memleket basshysy ınvestısııalyq tartymdylyqty arttyrýǵa kóp jaǵdaıda Eýrazııalyq ekonomıkalyq odaqtyń jumysy yqpal etip otyrǵanyna nazar aýdardy.
– Eń tómengi salyqtar, ákimshilik kedergilerdi joıý, memlekettik retteýdiń boljamdylyǵy, ınvestorlar men memlekettiń ózara qarym-qatynasynyń turaqtylyǵy bizdiń eldi 180 mıllıon halqy jáne kólemi 2 trıllıon dollardan astam ishki jalpy ónimi bar Eýrazııalyq ekonomıkalyq odaqtyń alyp naryǵyna kirý úshin eń «jaqsy qaqpa» retinde kórsetedi. Biz elimizdiń ınvestısııalyq ahýalyn budan ári de jetildire beretin bolamyz, – dedi Nursultan Nazarbaev.
Qazaqstan Prezıdenti bizdiń elimiz jańa Jibek jolynyń ekonomıkalyq áleýetin iske asyrýǵa qatysyp jatqanyn atap ótti. Atap aıtqanda, quryltaıshysynyń biri respýblıkamyz bolyp sanalatyn Infraqurylymdyq damýdyń azııalyq banki quryldy. Budan bólek, Qazaqstan tıisti kólik ınfraqurylymyn qalyptastyryp jatyr.
Nursultan Nazarbaev Astanada ótetin EKSPO-2017 kórmesi energetıka salasyndaǵy ozyq álemdik ázirlemeler men trendterdi kórsetý úshin tıimdi alań bolatynyn atap kórsetti.
– Kórme bizdiń jemisti yntymaqtastyǵymyzǵa da qýatty serpin beredi. Sizderdiń barshańyzdy EKSPO-2017 kórmesine qatysýǵa shaqyramyn. Búgingi forým Qazaqstan men Italııa arasyndaǵy qarym-qatynastyń nyǵaıýy jolyndaǵy taǵy bir eleýli qadamǵa aınalatynyna senimdimin, – dedi Prezıdent.
Memleket basshysy eki eldiń tek ekonomıkalyq qana emes, sonymen qatar, mádenıet jáne bilim berý salalaryndaǵy qarym-qatynastar arqyly da tyǵyz baılanysta kele jatqanyn eske salyp ótti.
Italııa Premer-mınıstri Matteo Rensı óz sózinde ekonomıkalyq yntymaqtastyqpen qatar, eki el de Jer sharyndaǵy beıbitshilikti saqtaý, adamdar arasyndaǵy ózara túsinistik, mádenıetterdiń ózara únqatyýsy ıdeıasyn jaqtaıtynyn atap ótti.
– Qurmetti Prezıdent, men Sizge qymbatty dos retinde shyn júrekten alǵysymdy aıtamyn, – dedi Italııa Premer-mınıstri óziniń sózinde. – Bizdiń EKSPO-dan estafeta alatyn eldiń – Qazaqstannyń bıik mártebeli delegasııasynyń munda kelýi óte qýanarlyq jaǵdaı. Jyldyń sońyna qaraı biz baǵytymyzdy Astana–2017-ge qaraı buratyn bolamyz. Bul – shynynda asa mańyzdy oqıǵa.
– Búgin men Qazaqstan pavılonynda qymyz iship kórdim. Sosyn sizderdiń pavılonnan shyǵyp kele jatyp, bizdiń, ásirese, agroónerkásip kesheni baǵytyndaǵy yntymaqtastyǵymyzdyń keremet kúshine kóz jetkizdim, – dedi Matteo Rensı kelesi kezekte. – Italııa qazirden bastap osy salaǵa erekshe belsendilikpen atsalysyp jatyr. Biz Astanada tek azyq-túlik ónimderi jaǵynan ǵana emes, sonymen qatar, agroónerkásip kesheni jabdyq-jaraqtary men ónimderi tarapynan da ózimizdi kórsete alamyz. Biz bul sektorda baısaldy jumys atqaratyn bolamyz. Mılan – Italııanyń tek ekonomıkalyq ortalyǵy ǵana emes, sondaı-aq, akademııa áleminiń astanasy, ýnıversıtetter qalasy. Biz ózara tájirıbe almasý úshin basqa ýnıversıtettermen de jumys jasaǵymyz keledi.
– Azııa men Eýropanyń barlyq elderi planetamyzdy ekstremızmnen, dinı fanatızmnen qorǵaý jolynda yntymaqtasqany mańyzdy. Bizder den qoıýǵa tıisti birinshi element – ózara qurmet, kómek jáne tózimdilik arqyly beıbitshilik pen qundylyqtardy qorǵaý jolyndaǵy geosaıası deńgeıde birlesken kúsh-jiger, – dedi Matteo Rensı.
Ol Nursultan Nazarbaevtyń basshylyǵymen Qazaqstan táýelsizdik jyldary Eýropa men Azııa arasyndaǵy «únqatysý arnasyna» aınalǵanyn, iskerlik toptar ókilderi úshin de bul mańyzdy jaıt bolyp sanalatynyn atap ótti. Agroónerkásip pen energetıka salasyndaǵy áleýetti iske asyrý, sondaı-aq, joǵary oqý oryndary arasynda tájirıbe jáne stýdentter almasý qajettigine toqtaldy.
Bıznes-forým barysynda «QazMunaıGaz» UK» AQ pen «Enı Isataı B.V.» kompanııasy arasyndaǵy «Isataı» ýchaskesindegi barlaý jáne óndirý jobasyna qatysýdaǵy úlesin berý jónindegi kelisim, Investısııalar jáne damý mınıstrligi men Italııanyń «Tenaris» kompanııasy arasyndaǵy ózara túsinistik týraly memorandýmy, Investısııalar jáne damý mınıstrligi men Italııanyń «Metalfar Prodotti Industriali SPA» kompanııasy arasyndaǵy ózara túsinistik týraly memorandýmy, Investısııalar jáne damý mınıstrligi men «Italcementi Group» kompanııasy arasyndaǵy ózara túsinistik týraly memorandýmy, «Kaznex Invest» eksport jáne ınvestısııalar jónindegi ulttyq agenttigi» AQ pen «Inalca S.p.A.» kompanııasy arasyndaǵy ózara túsinistik týraly memorandýmy, «QazMunaıGaz» UK» AQ pen DRILLMEC S.p.A. kompanııasy jáne Aksai Industrial Park LLP arasyndaǵy nıettestik týraly memorandýmy, Astana qalasy ákimdigi, Qazaqstannyń Mashına qurastyrýshylar odaǵy jáne «ANIMA» mashına qurastyrý ónerkásibiniń Italııa qaýymdastyǵy federasııasy arasyndaǵy yntymaqtastyq týraly memorandýmy sııaqty birqatar mańyzdy qujattarǵa qol qoıyldy.
Memleket basshysy Nursultan Nazarbaev Halyqaralyq kórmeler bıýrosynyń Bas hatshysy Vısente Lossertalespen de kezdesti. Kezdesý barysynda Astanada bolatyn halyqaralyq EKSPO-2017 kórmesin uıymdastyrý jáne ótkizý máseleleri talqylandy.
Nursultan Nazarbaev Mılandaǵy EKSPO-2015 kórmesi Qazaqstan tarapyna tıisti tájirıbe alý turǵysynan jaqsy múmkindik beretinin atap aıtty.
– Astanadaǵy barlyq nysandardyń qurylysy, ýáde etkenimizdeı, 2016 jyldyń sońyna deıin aıaqtalady. Qarjylandyrý qamtamasyz etildi, qajetti merdigerlik uıymdar iske jumyldyryldy. Búkil jumys kestege sáıkes júzege asyrylýda, onyń barysyn jeke ózim baqylap otyrmyn, – dedi Qazaqstan Prezıdenti.
Halyqaralyq kórmeler bıýrosynyń Bas hatshysy óz kezeginde Nursultan Nazarbaevtyń EKSPO-2017 jobasynyń qozǵaýshy kúshi ekenine jáne bul jaǵdaı onyń tabystylyǵynyń kepili bolatynyna nazar aýdardy.
– Daıyndyqtyń tıisti deńgeıde ótetinine jáne kórmeniń keremet bolatynyna shúbásiz senimdimiz, – dep atap ótti V.Lossertales.
Maýsymnyń 28-i kúni Nursultan Nazarbaev Italııanyń Eni kompanııasynyń bas atqarýshy dırektory Klaýdıo Deskalsımen kezdesti. Mılanda ótken kezdesýde kompanııanyń Qazaqstandaǵy qyzmetiniń qazirgi máseleleri qarastyryldy jáne onyń eldegi munaı-gaz salasyn budan ári damytýǵa qatysýynyń negizgi baǵyttary talqylandy. Taraptar, sondaı-aq, Qashaǵan kenishin ıgerý aıasynda tııanaqty ári úılesimdi jumysty qamtamasyz etýdiń qajettiligin atap ótti. Osyǵan deıin Qazaqstan Úkimetiniń Qashaǵandy 2016 jyldyń sońynda nemese 2017 jyldyń basynda iske qosýdy josparlap otyrǵany habarlanǵan edi.
Osymen Memleket basshysynyń Italııaǵa sapary aıaqtaldy. Al Qazaqstannyń ulttyq kúni 31 qazanǵa, ıaǵnı Mılan EKSPO-sy jabylǵanǵa deıin sozylady.
Serik PIRNAZAR, «Egemen Qazaqstan» – Mılannan.
Sýretterdi túsirgender
S.BONDARENKO, B.OTARBAEV.
