Atyraýdyń polıseılerine ámbebap qurylǵy berildi

ATYRAÝ. 2 naýryz. Atyraý qalalyq ishki ister basqarmasyna qarasty jol-patrýldik polısııa batalonynyń ınspektorlary bir mezgilde beınekameraǵa, fotosýretke jáne dybys jazýǵa arnalǵan ámbebap qurylǵymen qamtyldy. Bul týraly egemen.kz tilshisi habarlady. Basqarma basshysynyń orynbasary mindetin atqarýshy Erlan Bıǵambaevtyń jýrnalısterge málim etkenindeı, batalonda 220 ınspektor qyzmet etedi. Ázirge olardyń 25-i keýdege taǵatyn ámbebap qurylǵymen qamtyldy. Degenmen, bıylǵy birinshi toqsannyń aıaǵyna deıin mundaı qurylǵymen jol-partýldik polısııa batalonyndaǵy jeke quramnyń 80 paıyzyn qamtý kózdelip otyr. Bul qurylǵyny qosýly kúıinde polısııa qyzmetkeri kezekshilikke shyǵar aldynda rasııamen birge alady. Beınekamera 12 saǵat boıy qosylyp turady. Buǵan qosa fotokamerasy men dıktofony jáne bar. «Bul qurylǵyǵa jazylǵan aqparatty polısııa qyzmetkeriniń óz betimen ózgertýi múmkin emes. О́ıtkeni, oblystyq ishki ister departamentiniń tehnıkalyq baılanys basqarmasynda munyń «tilin» biletin bir qyzmetker bar. Tek sol qyzmetkerdiń derekter bazasyna kirýine ruqsat etilgen. Tipti, basshylyq quram da derekter bazasyna kirýdiń qupııa sanyn bilmeıdi. Eger qandaı da bir oqıǵaǵa baılanysty daýdy anyqtaý máselesi týyndasa, tek arnaıy maman ǵana derekter bazasyna kirip, beınejazbanyń ne fotosýrettiń úzindisin usyna alady», dedi basqarma basshysynyń orynbasary mindetin atqarýshy Erlan Bıǵambaev. Bir ereksheligi, ámbebap qurylǵymen kez kelgen quqyq buzýshylyqty taspaǵa túsirýge bolady. Tipti, túngi mezgilde de sapaly jazba jasaýdyń múmkindigi bar. Ásirese, bul qurylǵy quqyq buzýshylar arasynda týyndaıtyn daýly tustardy, ishimdik ishken, kinásiz ekenin dáleldeýge tyrysatyn, sonymen birge, jol-patrýldik polısııa qyzmetkerleriniń talabyna baǵynǵysy kelmeıtin júrgizýshilerdiń áreketin taspaǵa túsirýge taptyrmaıtyn qurylǵy bolmaq. Árıne, polısııa qyzmetkerleriniń jaýapkershiligin arttyrý men jemqorlyqtyń jolyn kesýgede oń áseri tıgizedi degen úmit bar. Joldasbek Shópeǵul. Derek:egemen.kz. Sýret: Rahym Qoılybaev.