Eki dúrkin álem chempıony Arman OSPANOV: «Maqsatym – týǵan Otanymnyń namysyn qorǵaý»

Sochı. Platforma S-70. Álem Kýbogy jolyndaǵy halyqaralyq týrnır. Már­tebeli qonaqtar otyratyn lojada Reseı Prezıdenti V.Pýtın, Reseı Premer-mınıs­tri V.Medvedevpen birge Qazaqstan Respýblıkasynyń Prezıdenti Nursultan Ábishuly Nazarbaev otyr. Fınal. Sharshy alańǵa Arman Ospanov shaqyryldy. Jan alyp, jan bergen aıqastyń bir sátinde qarsylasy ońtaıǵa kelip qaldy. Arman sol qolmen talmaý tustan uratyndaı yńǵaı kórsetken. Qarsylasy qolyn tósep úlgerdi. Aldamshy qımyl kórsetken Arman sol qolmen emes, oń qolymen ja­ǵynan opyra urdy. Shatqaıaqtap baryp qulaǵan qarsylasynyń ústine túz taǵysy sııaqty qona ketken qazaq jigiti turǵyzǵan joq. Soıdaýyldaı qoldarymen bas, shyqshytty kózdep soqqyǵa kómip tastady. Tóreshi ushyp kelip ortaǵa tústi. Tehnı­kalyq nokaýt! Referı qolyn kóterip jatqanda kóziniń astymen Elbasyna urlanyp qaraǵan. Nurekeń razy bolyp, nurlanyp otyr eken. Jeńimpazdardy marapattaǵanda Armanǵa Kýbokty Vladımır Pýtın tapsyrdy. Reseı Prezıdentiniń aldynda kishilik saqtap, qol bermek edi, Pýtın qapsyra qushaqtap keýdesine basty. «Jaraısyń!» dedi. Áskerı sambodan eki dúrkin álem chempıony, jaýyngerlik jekpe-jek, pankratıon, erejesiz jekpe-jekterden halyqaralyq týrnırdiń jeńimpazy, «Alash praıdtyń» oǵlany Arman Ospanov kópten beri bir jaǵymsyz oqıǵanyń ortasynda qaldy. Áýeli bir táýelsiz telearna «Álem chempıony Arman Ospanovtyń turmys jaǵdaıy máz emes. Qazaqstannan ketkeli jatyr. Otanyn aýystyrmaqshy» dep súıinshi suraǵandaı laq etkizgen. Odan ári qaraı elektrondy saıttar, sarjaǵal gazetter ný qamysqa órt qoıǵandaı asyǵystyqpen osy habardy jarysa jazyp, áleýmettik jelide talqyǵa salyp jiberdi. Bireý Otanyn «satqany», jeńil aqshaǵa qyzyqqany úshin Ospanovty jerden alyp jerge salyp kústánalady, bireý «onysy durys, eńbegińdi baǵalamaǵan elde ne qylasyń, jolyń bolsyn» dep bata bergensidi. Armandy taýyp aldyq. Qaıyn atasy, Saryaǵash aýdandyq ardagerler keńesiniń tóraǵasy Mustafa Súleımenov – el sózin usta­ǵan kósheli kisi. «Armanmen sóılestim, mynaý jala ǵoı» dep kúıingen. Arman aıtty. Almatyda sambodan ótetin Álem kýbogy jarysyna daıyndalyp jatqanda jattyǵýǵa oblystaǵy táýelsiz arnanyń jas tilshisi suhbat alýǵa kelipti. Anany, mynany surady, sońynda úıge baryp otbasy jaǵdaıynda habar jasaǵysy kelgendigin aıtty. Men ózim jeke ómirimdi qazbalap suraǵanyn qalamaımyn, biraq qyz bala bolǵannan keıin kelisimimdi berdim. Áýelde bári durys boldy. Tilshilerdiń ár jarysta qoıyp júrgen saýaldaryn qoıdy. Jaýap berdim. Otbasymyzdyń jaǵdaıyn surady. Jaspyz, jeke úıimiz joq, pá­ter jaldap turatynymyz ras. Sam­­bo Olımpıada baǵdar­la­ma­­­syna kirmegendikten, aılyq jala­qymyzdyń basqa tartsa aıaq­qa, aıaqqa tartsa basqa jetpeı jata­tyndyǵy ras. Ony da surap bildi. Biraq, tilshiniń onda nege boksqa aýyspadyńyz, onda aqsha kóp qoı degen saýaly oıǵa qaldyrǵan. Sportty bilmeıtinderdiń, kúres pen bokstyń arasy aspan men jerdeı ekenin túsinbeıtin jannyń saýatsyz suraǵy tań qaldyrǵanymen, jaýap berdim. Aldaǵy josparlarymdy surady. Shetelderde Gennadıı Golov­kın sııaqty Qazaqstan baıraǵyn kóterip týǵan Otanymnyń namysyn qorǵaý maqsatym ekendigin aıttym. Bar bolǵany osy. Jas tilshi Arman Ospanov taǵdyryna razy emes, jaǵdaıy nashar, sondyqtan shaqyrtý alǵan memleketterdiń biriniń atynan álemdik dodalarǵa túsetindigin attandap aıtyp jiberipti. Áleýmettik jeliler gý ete qaldy. Tań qalǵanym, eshqaısysy menimen sóılespese de, kórmese de birinen biri asyryp oıbaılap jatyr. Dostarym, tanystarym «munyń ne?» deıdi. Mundaıda ne aıtasyń? Álgi jas tilshini taýyp aldym. Jylap-eńirep keshirim surady. Túsinbeı qalǵanyn aıtty. Te­risteme berdi. Biraq, tutanǵan órt­ti sóndirý qıyn eken. Qatty namystandym. Almatyda jaýyn­gerlik sambodan ótken álem kýbogynda bes qarsylasymdy da aıqyn basymdylyqpen jeńip, Qa­zaqstannyń Ánuranyn oınat­qanymda, qazaq baıraǵyn jamylyp turǵanymda da meni Otanymda ýaqytsha júrgendeı sezingen jandar boldy. Ańdaýsyz aıtylǵan sóz aryma kúıe jaqty. Aǵa, bas-paıdasy úshin Otanym­dy  aýys­tyratyn qýyskeýde men emespin. Jaqsy áke-shesheniń táliminde boldym, óz ultymdy, Elbasymdy jaqsy kóretin patrıot azamattardyń birimin. Nege men Otanymnan ketýim kerek?! Eki dúrkin álem chempıony osylaı dep taýsylǵan. Sporttyq ómirbaıanyna kelsek Ońtústik Qazaqstan oblysy, Tóle bı aýdanynan ushqan tastúlektiń jeńisteri kóńil marqaıtady. Tóle bı aýdanynda Janpeıis Jabaev atty ustaz bapker bar. «Nurjan Seri» stadıonynda qazaqsha kúres, sambo, dzıýdo kúres túrlerinen júzdegen aıtýly balýan daıyndaǵan bapker. Kishkentaı kógenkózderdi jınap alyp, uly sportshylar týraly aıtqanda endi kúres kilemine túsken oqýshy Arman Ospanov armandap otyrar eken. «Shirkin-aı, meniń de baǵym janyp, tym bolmasa Qazaqstannyń chempıo­ny atansam ǵoı» dep. Sol Arman Ospanov – baıaǵy Qajymuqan atasy japon Sa­rakıkımen ólim men ómir aıqasyna túsken djıý-djıtsý kúresinen eki dúrkin Azııa chempıony, jaý­yngerlik jekpe-jek sambodan eki dúrkin álem chempıony. «Alash praıd KZ» jaýyngerlik klýbynyń beldi múshesi «Uly maıdan –  Velıkaıa bıtva» týrnırinde top jardy, Reseıdiń Sochı qalasynda Qazaqstan, Reseı prezıdentteri qatysqan «Platforma S-70» týr­nırinde bes jekpe-jek ótkizip, fınaldyq aıqasta reseılik Alekseı Polpýdnıkovti nokaýtqa jiberip, Vladımır Pýtınniń qolynan Ký­bokty aldy. Talaı álem chempıony bastaǵan myqtylardan basym túsip, jeńimpaz atandy. «Nur Otan» partııasy aıasynda «Suńqar» jobasymen tárbıesi qıyn balalardy toptap, úlken sportqa baýlyp júr. Sóıtken, batyr jigit jazyqsyz jaladan jalpy kúızelip júr. Jasyma dedim. Týǵan Otanyn baılyqqa satatyn pende ol emes. Ol solaı aıtty. Biz jetkizdik. Jeńisti joryqtary kóp bolǵaı. Baqtııar TAIJAN, «Egemen Qazaqstan». ShYMKENT.