Sozaqtyń sary sazany

Qazir «alma pis, aýzyma tús» dep otyratyn zaman emes. Qoly qımyldaǵannyń aýzy da qımyldaıdy. Oblys ákimi Asqar Myrzahmetov orta sharýalardyń qolyna myqtap kúrek ustatqan. Úlken sharýashylyqqa shamań kelmeıdi eken, óz otbasyńdy erkin asyrarlyqtaı kásipti meńger. Jeńildetilgen nesıemen on saýyn sıyr al. Bordaqylaýǵa on ógiz al. Ýaqytpen jemin, shóbin ber, sýar. Sútti qaıda ótkizem demeısiń, osy maqsatqa arnaıy qurylǵan selolyq tutynýshy kooperatıvi bar. Bordaqylanǵan ógizderdi qaı bazarǵa shyǵaram dep basyńdy qatyrma, kooperatıv ózi soıyp, ózi ótkizip, qolyńa kelisilgen aqshańdy ákep beredi. Bul aýyl sharýashylyǵy úshin eń tıimdi tásil bolyp tur. Oblystyq aýyl sharýashylyǵy basqarmasy da qaı qajetińizdi ashýǵa daıyn. Osylaısha orta sharýanyń jaǵdaıy birshama jaqsaryp qaldy. Qalaıda aýyl eńbekkerlerin jumyspen qamtýdy oılaıtyn oblys ákimi endi oblysta 2015-2016 jyldarǵa arnalǵan balyq sharýashylyǵyn damytý baǵdarlamasyn qolǵa alǵan. Mundaǵy maqsat balyq sharýashylyǵyn damytý arqyly tabysqa shyǵý. Ońtústikte ersili-qarsyly aqqan aǵyn sý kóp bolmaǵanymen «Shardara» sý qoımasy, oǵan jalǵas «Kóksaraı» sý rettegishi, Shámshiniń áni arqyly jalpaq Qazaqstanǵa áıgili Arys ózeni, aryndy Keles, Aqsý, Qarasý sııaqty shaǵyn ózender, Syrdarııadaı mol aıdyn bar. Bólinip qashqan saǵalaryn isker jigitter jalǵa alyp, shabaq jiberip paıdaǵa shyǵa bastaǵan. О́tkende gazetimizde Otyrardyń bekire tuqymdas balyǵy jaıly aıttyq. Oblys basshysy aımaqta 27 taýarly balyq sharýashylyǵyn qurmaq nıette. Osy jobany qoldaý úshin «Maksımým» aımaqtyq ınvestısııalyq ortalyǵy» JShS 400 mln. teńge jeńildetilgen nesıe berip otyr. Osy berekeli sharýaǵa arqa­men qoıyndasyp jatqan Sozaq aýdany da kirisip ketti. Sozaq­taǵy «Babata» sý qoımasyna «KazGoldFish» seriktestigi 100 myń sha­baq jiberdi. Taýdan erigen qardan quralǵan sý qoımasynyń sýy tushy bolǵandyqtan baly­ǵy­nyń eti bal tatıdy. Seriktestik ókiliniń aıtýy boıynsha, osy shabaqtar qońyr kúzde búıirleri sary altyndaı jarqyraǵan kebeje bas sazandarǵa aınalady. Olardy kútip baptaıtyn ıhtıolog mamandar bar. Sozaq aýdanynyń ákimi Amanǵalı Aı­myr­zaev ta murtynan kúledi. Ákim­niń kóńildenetinindeı bar. Balyq sharýashylyǵy 15-20 adam­ǵa jumys orny. Ekinshiden, malymen, jer asty baılyǵymen dańqy shyqqan sozaqtyqtar Shardaranyń sary sazanyna endi jerik bolmaıdy. Kásiporyn aldaǵy ýaqytta balyq ónimderin óńdeıtin shaǵyn sehtar ashyp, ishki naryq pen eksportqa shyqpaq nıette. Bul bos qııal emes. Árbir is osyndaı shaǵyn bastaýlardan qýat alady. Baıaǵyda Araldyń bir qyzy qyrǵa uzatylǵanda «bal tatyǵan balyqtyń etin mensinbeıtin basym qolańsa sasyǵan qoı etine qor bolatyn boldym», dep syńsyp barady deıdi. Sol aıtqandaı, tórt túligimen máshhúr Sozaq endi aldyńyzǵa bilekteı sazanyn syıǵa tartady. Baqtııar TAIJAN, «Egemen Qazaqstan». Ońtústik Qazaqstan oblysy.