Shymkentte turǵyndardy kepilge alǵan kúdikti ustaldy

ASTANA. 30 maýsym. Shymkentte «telefon lańkesi» ustaldy. 1963 jylǵy er adamǵa qatysty Qylmystyq kodekstiń 273 baby («Lańkestik aktisi týraly kórineý jalǵan habarlama berý») boıynsha qylmystyq is qozǵaldy. Bul týraly Ońtústik Qazaqstan oblysy ishki ister departamentiniń baspasóz qyzmetine silteme jasaǵan «QazAqparat» habarlady. Oqıǵa 29 maýsym kúni saǵat 23:30-da oryn alǵan. Ulttyq qaýipsizdik komıteti departamentiniń kezekshilik bólimine telefon soqqan belgisiz er azamat birneshe adamdy tutqynǵa alǵanyn, bes qabatty úıge mına qoıǵanyn aıtyp, atalǵan departamenttiń joǵary ókiletti ofıserimen kezdesýin talap etken. Sondaı-aq, ol aqsha men ushaq qajet ekenin aıtyp, qaladaǵy túrmeden jazasyn ótep júrgen birneshe sottalǵan azamatty bosatýyn talap etken. Ishki ister basqarmasynyń bastyǵy Danııar Meıirhannyń aıtýynsha, Ońtústik Qazaqstan oblysy ishki ister departamentiniń generaly Asqar Ospanov jáne basqa joǵary ókiletti ofıserlerdiń basshylyǵymen bir jarym saǵat júrgizilgen is-qımyldar kezinde kúdikti syrtqa shyǵarylyp, sol jerde ustaldy. Aıta keteıik, qoıylǵan bomba týraly telefon habarlamasynan keıin 300-den astam adam qaýipsiz jerge kóshirilgen. Olardyń arasynda bes qabatty úıdiń turǵyndary men eki dámhananyń jáne sol mańdaǵy shaǵyn marketterdiń kelýshileri men qyzmetkerleri bolǵan. Munan bólek qorshalǵan orynda arnaıy operasııa aıaqtalǵansha kólik qozǵalysy toqtatylyp, kommýnıkasııalar ajyratylǵan. Talǵat Raıymbek. Derek, sýret: «QazAqparat».