Erlik eshqashan eskirmeıdi

9 mamyr – Jeńistiń qyzyl týy Reıhstagta jelbirep, fashıstik Germanııanyń kúıregen kúni. Sodan beri arada qansha ýaqyt atqan oqtaı, shapqan attaı zymyrap ótse de, jan jarasy umytylar emes. Aǵa urpaqtyń erlik dástúrlerin óskeleń urpaq árkez qasterleıdi. Sonyń jaqsy bir úlgisi jańa jyl qarsańynda qanat qaǵyp, jan-jaqty qoldaý tapqany belgili. Oblys, aýdan, qala, aýyl basshylary soǵys ardagerleriniń úılerinde bolyp, arnaıy syılyqty saltanatty túrde tabys etkenderi málim. О́mir men ólim beldes­ken sátte nebir ǵalamat erlik­terimen kózge túsip, ortaq Otan­dy qorǵaý jolyndaǵy qahar­mandyq joryqtary men qandy shaıqastary qalaı ulyqtasa da jarasady. Oblysta Muqataı Aıtbaev pen Vasılıı Tereıkovskıı aqsaqaldardy bilmeıtinder kemde-kem. Ekeýiniń taǵdyry uqsas. Kishi ofıserler daıyndaıtyn qysqasha kýrstan ótkennen keıin birden aldyńǵy maıdan shebine alynǵan. Eýro­pa elderin jaýdan azat etý opera­sııalaryna qatysyp, jaýyn­gerlik erlikteri úshin bir­neshe orden-medaldarmen marapattalǵan. Jeńis kúnin biri Germanııada, ekinshisi Bal­tyq jaǵalaýynda qarsy alǵan. Olardyń beıbit ómirdegi eńbek joldary órtten qorǵaý, azamattyq qorǵanys salalarynda jalǵasyp, óz mindetterin abyroımen atqara bildi. Bıyl biri 94 jasqa, endi biri 90 jasqa tolyp otyrǵan qarııalar kárilik dendep, den­­saý­lyqtary syr bergenine qaramastan, kóńilderin kóterińki ustaýǵa umtylady. Osydan úsh aıǵa jýyq ýaqyt buryn quttyqtaýǵa kelgen oblystyq tótenshe jaǵdaılar departamenti basshysynyń orynbasary Áset Ysmaǵulovty, órt sóndirý jáne avarııalyq-qutqarý qyzmetiniń jetekshisi Serik Ǵaısındi jáne ardagerler keńesiniń ókili Saǵynbaı Ýálıevti jyly shyraımen qarsy alyp, áńgime tıegin aǵytqan edi. О́tken kúnderden syr shertip, qarýly maıdandastaryn, ot keshýlerin eske túsirgen bolatyn. Ájim torlaǵan júzderine birde kúlki úıirilip, birde muń torlap, nebir qıyndyqtar men taýqymetterge tóze bilgen, tótep bergen jeńimpaz urpaqtyń bolattaı berik, qaısar minezi kóz aldymyzǵa kelgendeı boldy sol sátte. Ǵasyrǵa jýyq ómir keshse de qulaqtary túrik, kókirek­teri oıaý. Tileýleri – el ústinde, Otan­nyń amandyǵy. Búgingi Qazaq­stannyń jarasymdy­ tir­ligi men aýyzbirlikti yntyma­ǵyna qýa­nady. Aspandy so­ǵys bulty torlamaǵanyna shúkir­shilik aıtady. Keshegi maıdangerler, búgin­gi ardagerler 9 mamyr kúni №1 órt sóndirý aýmaǵynda maı­dan palatkasy qurylatynyn es­tip, soldattardyń botqasyn jeı­tin boldyq qoı degendeı bir-birine qarasyp, jymyńdasyp qalǵan edi. Sol kúnge de kóp qalǵan joq. Asqar YSMAǴULOV, oblystyq tótenshe jaǵdaılar jónindegi departamenttiń kadr jumysy bóliminiń bastyǵy. PETROPAVL.