Halyq saılaýǵa qatysýǵa daıyn

Prezıdent saılaýy aldynda áleýmettik zertteýler uıymdary da belsendilikterin arttyrýda. Osyǵan deıin «Áleýmettik zertteýler ınstıtýtynyń» jumysy týraly jazǵan bolsaq, endi «Demokratııa ınstıtýty» da aldymyzdaǵy saılaýǵa qatysty óziniń alǵashqy boljamdaryn jarııalady. Keshe osy ınstıtýttyń dırektory Iýlııa Kýchınskaıa jýrnalısterge brıfıng berip, halyqtyń elektoraldy belsendiligi bo­ıynsha júrgizilgen alǵashqy saýaldamanyń qorytyndysyn aıtty. Biz óz jumysymyzdy «Qazaqstannyń azamattyq alıansy» uıymymen birlesip júrgizemiz. Osy uıymnyń tapsyrmasymen qazaqstandyqtardyń 15 jáne 25 naýryz aralyǵyndaǵy saılaýǵa qatysty belsendiligi zertteldi. Zertteý jumystary Qazaqstannyń barlyq oblystarynyń ortalyqtary jáne Astana men Almaty qalalary boıynsha júrgizildi. Saýaldamaǵa osy qalalardyń 18 jastan asqan 2000 turǵyny qatysty. Mine, osy azamattardyń 92 paıyzy 2015 jyldyń 26 sáýirinde Qazaqstanda prezıdenttik saılaý bolatynynan habardar ekenin aıtty, dedi Iýlııa Kýchınskaıa. Saýaldama júrgizilgen azamattardyń 68 paıyzy bul týraly habardy telearnalardan estigenin aıtqan. Al 78,2 paıyzy respýblıkalyq gazetter men jýrnaldardan oqypty. Sondaı-aq, saılaý týraly habardy respondentterdiń 28,5 paıyzy jergilikti telearnalardan estigenin, 27,2 paıyzy ınternetten kórgenin aıtqan. Al oblystyq jáne qalalyq gazetter arqyly bilgenin 27,1, radıodan estigenin 25,3 paıyz respondentter aıtqan. Buǵan qaraǵanda, halyqtyń negizgi habar alatyn kózi – respýblıkalyq gazetter men jýrnaldar ekeni kórinip tur. Saılaýda daýys berýge suralǵandardyń 93 paıyzy keletinin jetkizgen. Sóıtip, halyqtyń daýys berýge daıyn ekeni kórinip tur. Sonymen qatar, elektoraldyq belsendilik kóbinese 18-24 jas shamasyndaǵy jastar men zeınetkerler arasynan kóp baıqalǵan. Sondaı-aq, saılaýǵa mindetti túrde qatysatynyn stýdentter men bıýdjet salasynda isteıtin qyzmetkerler aıtqan. Jaqsybaı SAMRAT, «Egemen Qazaqstan».