Batys Qazaqstanda Jáńgir hannyń kózindeı bolǵan orman otalýda

ORAL. 18 mamyr. Batys Qazaqstan oblysy Bókeı ordasy aýdany Orda aýylynda kezinde han Jáńgirdiń bastamasymen otyrǵyzylǵan qaraǵaıly orman bar. Barhan qumnyń ortasynan oryn tepken orman búginge deıin saqtalyp kelgen edi. О́kinishke qaraı, qazirgi tańda sol jerdegi qaraǵaılar kesilip jatyr. Bul týraly egemen.kz tilshisi habarlady. Orda orman sharýashylyǵy aýmaǵynda bolyp jatqan jaıttardy bizge oblys ortalyǵynan shalǵaıda jatqan sol aýyldan arnaıy kelgen zeınetker, aýdannyń qurmetti azamaty Esentaı Nurlybaev ashyna aıtyp berdi. Tipti ol otalǵan, ońdy-soldy kesilgen ormannyń sýretterin qosa kórsetti. Esentaı aqsaqaldyń aıtýynsha, osy jaıtqa qatysty Orda orman sharýashylyǵynyń basshylyǵy naqty bir shara qoldanbaı otyrǵan kórinedi. Al qaraǵaılarǵa qyrǵıdaı tıgender ony elektr arasynyń kúshimen taqta etip tildirip, úıdiń qurastyrmaly buıymdaryn jasap, satýdy ádetke aınaldyrǵan. «Buryn ákimshilik quqyqbuzýshylyq bolyp sanalǵan aǵashtar men ekpe aǵashtardy zańsyz kesý – qazirgi tańda, Orman kodeksine engizilgen ózgeristerge sáıkes, qylmystyq quqyqbuzýshylyqqa jatady», – deıdi el aǵasy. Sondaı-aq, ol: «XIX ǵasyrdyń alǵashqy shıreginde qoldan otyrǵyzylǵan ormandy otamaı, aıalap, keıinge urpaqqa amanattasaq, áldeqaıda abyroıly is bolar edi. Tarıhtyń jańǵyryp, sanamyzda qaıta oıanýyna da kóne jádigerdeı bolǵan osyndaı jaýharlarymyzdyń septigi mol. Endeshe ormannyń otalýyna jol bermeıik», – dedi. Temir Qusaıyn. Derek, sýret: egemen.kz.