Reseı-Qazaqstan oıynyn «Habar» tikeleı efırde kórsetedi

ASTANA. 31 naýryz. Búgin fýtboldan Qazaqstan ulttyq quramasy Reseımen joldastyq kezdesý ótkizedi. Saǵat 23:00-de bastalatyn oıyndy otandyq «Habar» telearnasy tikeleı efırde kórsetedi. Bul týraly egemen.kz habarlady. Kezdesý Reseıdiń Hımkı qalasyna ótedi. Iýrıı Krasnojan jattyqtyratyn bizdiń qurama keshe oıyn ótetin «Hımkı-Arena» stadıonynda alǵashqy jattyǵýyn jasady. Aıta keteıik, bas jattyqtyrýshy bul joly qaqpashylar Nenad Erıch pen Vladımır Logınovskııdi qasyna ertken joq. Sondaı-aq, úsh kún buryn Islandııaǵa qarsy oıynda negizgi quramda alańǵa shyqqan Renat Abdýlın, Azat Nurǵalıev jáne Dáýrenbek Tájimbetovter de Reseıge barǵan joq. Qarsylastarymyzdyń bas jattyqtyrýshysy Fabıo Kapello ekeni belgili. Reseı sońǵy oıynyn 27 naýryz kúni 2016 jylǵy Eýropa chempıonatyna irikteý týrnıri aıasynda Chernogorııaǵa qarsy ótkizdi. Alaıda, atalǵan kezdesý jankúıerlerdiń basbuzarlyǵyna baılanysty aıaqsyz qaldy. Sondaı-aq, dál sol matchta Reseıdiń negizgi qaqpashysy Igor Akınfeevtiń jaraqat alǵanyn aıta keteıik. Qos komanda arasyndaǵy sońǵy oıyn 2008 jyly mamyr aıynda ótken edi. Atalǵan kezdesýde bizdiń komandanyń qaqpasyna jaýapsyz 6 gol jiberip, oısyraı jeńilgeni esimizde. Ol kezde Qazaqstan quramasyn Arno Paıpers jattyqtyrsa, Reseı tizgini Gýs Hıddınktiń qolynda bolatyn. Reseıdiń «Sport-Ekspress» basylymynyń boljamy boıynsha búgin komandalar myna qurama alańǵa shyǵýy múmkin: Reseı: Lodygın, Shennıkov, V.Berezýskıı, Novoselsev, Kozlov, Ozdoev, Mogıleves, Kanýnnıkov, Torbınskıı, Samedov, Dzıýba. Qazaqstan: Sıdelnıkov, Gýrman, Logvınenko, Qýantaev, Vorotnıkov, Súıimbaev, Taǵybergen, Smaqov, Qonysbaev, Shetkın, Islamhan. Elaman Qońyr. Derek: egemen.kz. Sýret: fanatik.kz.