Ázil-ospaq, syn-syqaq buryshy
Bólimdi jazýshy-satırık Berik Sadyr júrgizedi
Kúlli álemniń kúlkisi
Gersog bir derevnıadan ótip bara jatyp, bet álpeti ózinen aýmaı qalǵan sharýaǵa:
– Aıta qoıshy, ekeýmiz óte uqsas ekenbiz, bir kezderi osy jermen meniń ákem ótken bolýy kerek á?! – dep mysqyldaıdy. Sonda sharýa da sózge qara jaıaý emes eken:
– Jo-joq, gersog myrza, naqty derek boıynsha bir kezderi osy jermen sizdiń shesheńiz ótken, – depti.
***
Keńes ókimetiniń tusyndaǵy saıası bıýro múshesine bylaı dep suraq qoıypty:
– «Agressııa» degen sózdiń mán-maǵynasyn túsindirip berińizshi?
– Bul degen – bir memlekettiń kelesi bir memleketke qarýly kúshpen SSSR-diń ruqsatynsyz basyp kirýi...
***
Júrip-turyp, oınap kúlgenderine birneshe aı ótken soń qyz bala jigitine erkelep:
– Maýbasym, meni týǵan-týystaryńmen tanystyrmaısyń ba? – degende, jigiti jelkesin qasyp:
– Sony qaıterimdi bilmeı basym qatty... Balalarym enemniń qolynda, al áıelim jaqynda ǵana kýrortqa ketip edi... – depti.
***
– Oqýǵa tússem be eken, joq kúıeýge shyǵaıyn ba?
Sheshesi:
– Qaısysynan qulap qalmaısyń, sony iste, balam.
***
– Qymbattym, kıim ilýshi qyzǵa sonsha nege jomarttyq kórsettiń?
– Janym, beri qarashy, ol maǵan qandaı tamasha palto berdi.
* Tatar ázilderi
Qıyn másele
Adamnyń maımyldan jaratylǵany týraly bir ǵalym leksııa oqypty. Tyńdaýshylar ǵalymǵa suraq bere bastaǵanda, bir qart adam:
– Men, zooparkte kóz ashqaly kelemin, mine tek kúzetshi bolǵanymnyń ózine bıyl tabandatqan 40 jyl boldy. Osynsha ýaqyt ishinde bizdegi maımyldardyń birde-bireýinen adam týǵan joq. Siz aıtqan maımyldan adam shyqqanda, bizdiń maımyldyń munysy qalaı?! – dep tań-tamasha bolypty.
Jezdeden qalǵan mura
Jezdesi ólgen bireýden joldastary:
– Jezdeńnen qansha mura qaldy? – dep suraıdy.
– Tórt qyz qaldy, – dep jaýap beripti baldyzy.
Tósektegi tórteý
Qaıyn atasy kúıeý balasynan:
– Qalaı turyp jatyrsyńdar, balam? – dep surapty.
Kúıeý balasy:
– Bir tósekte tórteý jatamyz, – dep jaýap beripti.
– Olaryń qalaı, jatar oryndaryń tar ma?
– Jatar oryn jetedi, tek tósekte qyzyńyz ólgen kúıeýin, men ólgen áıelimdi oılap jatamyz.
Taza aýanyń paıdasy
Ákmal aqsaqaldan:
– Jasyńyz alpystan assa da óńińiz áli jap-jas, bul nelikten? – dep surapty.
– Meniń jap-jas bolyp júrgenim áıelimniń arqasy ǵoı, – depti Ákmal. – Onyń ózi minezi shaıpaý adam, ylǵı urys-janjal shyǵaryp, tegi úıden meni qýyp shyǵady. Sóıtip, ómirimniń kóbi dalada, taza aýada ótip keledi. Jasyma qaramaı jasaryp júrgenim sodan.
Kóńildegi « kóriksiz» oılar
Adamnyń daryndy-darynsyz ekenin de kommýnıstik partııa anyqtap otyrǵan zamanda ómir keshkenderdiń de armany bar ma eken?!
***
Túrmeni de oılap tapqan – bostandyq.
***
Sosıalızmniń kúnde aldymyzǵa tartqan progresiniń arqasynda bolashaǵymyzdy boljaı almaı qaldyq. Bir «áttegen-aı» sol!
***
Ashtyq jarııalaý úshin de adam toq bolýy kerek eken. Sebebi, dúkenderde azyq-túlik azaıyp ári qymbattap edi, ashtyq jarııalaýshylar sany kúrt tómendedi.
***
Kommýnızm ornatamyz dep jetpis jyl tyrtańdaǵan Keńes Odaǵy halyqtary qoldarynan kommýnızm ornatýdan basqanyń bári keletinin dáleldeýge atsalysý ústinde boldy.
***
Zańdy jetik bilgen – qylmys ta jasaı biledi.
***
Qoǵam eki ıininen demalyp tur, demi qashan biteri belgisiz.
***
Jetpis jyl boıy dushpandardy Amerıka Qurama Shtattarynan izdep, áýre-sarsańǵa túsip júrsek, olar óz ortamyzda júr eken.
***
Neshe túrli partııa dúnıege keldi. Meni tańdandyratyny áli kúnge deıin maskúnemder partııasynyń uıymdaspaýy!
***
Tarıhty qaıta jazǵan adam – ony búldirmeı qoımaıdy.
***
Tarıhtyń «aqtańdaǵyn» óshiremin degen adam – sol tusta qara boıaýdy molyraq jaqpaq.
Saıymjan Erkebaı.
