Soltústik polıýske sapar

Qazaq geografııalyq qoǵamy Jerdiń soltústik polıýsine ekspedısııa jumysyn bastady. Jıhangerler sapar barysynda tabıǵattyń eń sýyq núktesine Qazaqstan Respýblıkasynyń Týy men Qazaqstan halqy Assambleıasy jylynyń týyn tigip, Soltústik polıýsti baǵyndyrǵaly otyr. Almaty qalasynan Norvegııanyń Oslo qalasyna ushaqpen jetip, odan ári Shpısbergen aralynda qosyn quryp, muz qursanǵan Barneo túbeginen Soltústik polıýske shańǵymen bastalatyn sapar quramynda Qazaq geografııalyq qoǵamynyń tóraǵasy Nurlan Abdýov, Qazaqstandyq blogerler alıansynyń jetekshisi Ǵalym Baıtoq, Voxpopuli.kz fotoreportajdyq saıtynyń bas redaktory Janna Ahmetova, «Shejire DNA» ǵylymı jobasynyń jetekshisi Nurbol Baımuhanovtar bar. Jıhangerlerdi beıbit saparǵa shyǵaryp salý rásiminde Qazaqstan Respýblıkasy Prezıdenti janyndaǵy «Qoǵamdyq kelisim» respýblıkalyq memlekettik mekemesi men Qazaqstan halqy Assambleıasynyń bir top músheleri Almatydaǵy Dostyq úıinde saltanatty shara uıymdastyryp, saparǵa attanyp bara jatqan top múshelerine qazaqtyń ulttyq bas kıimi tumaq pen sýyq tabıǵatta sep bolatyn qural-jabdyqtar syılady. Shpısbergen araly – Soltústik muzdy mu­hıtta ornalasqan polıarlyq aral. Norvegııa ámirliginiń eń shetki soltústik bóligine or­na­lasqan aral turǵyndarynyń sany 2600 adam. Olardyń qatarynda norvegter, orys­tar, ýkraındar men polıaktar bar. Barneo men Polıýske deıingi 200 shaqyrymdyq aralyqty qazaqstandyqtar táýligine 20-25 shaqyrym shańǵymen júrý, muzdaqtar arqyly ótý, muz­taýdyń jarylǵan tustarynan arnaıy qysqy shana sekildi qıyndyqtarǵa qarsy tura otyryp, júrip ótetin bolady. Qazaqstannyń búgingi jetistikterin álemniń alys aımaqtaryna nasıhattaýmen qatar ekspedısııanyń taǵy bir mindeti, planetanyń eń sýyq núktesinde ornalasqan halyqtyń qandyq-tektik quramyn anyqtaý, adamzat shejiresiniń tamyryn tereńdetý bolyp otyr. Ekspedısııa ózine júktelgen mindetti atqara otyryp Qazaqstan halqy Assambleıasynyń HHII sessııasyna deıin elge oralýǵa tıis. Qanat ESKENDIR, «Egemen Qazaqstan». ALMATY.