Logıstıka máselesi sóz boldy

M.Tynyshpaev atyndaǵy Qazaq kólik jáne kommýnıkasııa akademııasynda elimizdiń memlekettik «Nurly Jol» baǵdarlamasy aıasynda júrgizilip otyrǵan tranzıttik-kólik strategııasyn talqylaǵan ǵylymı-tájirıbelik konferensııa bolyp ótti. Otandyq tasymal jáne kólik máselesin tereńirek qozǵaǵan bul jıynǵa temirjol salasynyń ardagerleri, «Qazaqstan temir joly» ulttyq kompanııasynyń, Halyqaralyq avtomobıl tasymaly odaǵynyń, «QazjolǴZI» ak­sıonerlik qoǵamy men «QazAvtoJol» ulttyq kompanııa­synyń basshylary men mamandary qatysyp, elimizde salynǵan avtomobıl joldary men áýe jáne temirjol tasymalynyń ózekti máselelerin ortaǵa saldy. Konferensııa barysynda Beıneý – Jezqazǵan, Arqalyq – Shu­barkól temirjol jobalary men elimizdiń shyǵysy men batysyn baılanystyrǵan «Batys Qytaı – Batys Eýropa» avtodálizi jáne Qazaqstan – Túrikmenstan – Iran baǵytyndaǵy qatynasty retteıtin kiris-shyǵys qaqpa qyzmetin atqaryp turǵan mańyzdy joba týrasynda naqty derekter keltirilip, el ekonomıkasyn arttyratyn kóliktik logıstıka salasyn odan ári damytý máselesi kóterildi. Elimizdiń kóliktik logıstıka ınfraqurylymyn ilgeriletý maqsatynda Astana qalasynda ashylǵan negizgi hab-júıesi aımaqtardy ózara baılanystyra otyryp, avtomagıstral, temirjol jáne áýe qatynastary arqyly jedel de jeńil túrde baılanysý múmkindigine qol jetkizip úlgerdi. Jumysyn jańa bastaǵan shyǵys aımaǵyn batys oblystarmen baılanystyratyn logıstıkalyq habtyń aıaq alysy men teńiz joldary arqyly tasymal jasaý ınfraqurylymyn damytý máselesine memleket erekshe nazar aýdaryp otyr. Keleli keńeste kólik isiniń mamandary memlekettik «Nurly Jol» baǵdarlamasynda basa kóńil bólingen bul salany damytý arqyly el ekonomıkasyn jan­dan­dyrýmen qatar, qazaqstan­dyqtardy jumyspen qamtý, halyqtyń turmystyq áleýetin kóterý sekildi ulttyq saıasatty da óz merziminde saýatty júrgizýge negiz bolady degen pikir bildirdi. Qanat ESKENDIR, «Egemen Qazaqstan». ALMATY.