Batystyq qundylyqtarǵa bas ura bermeıik

Qazaqstan Respýblıkasynyń prezıdenttigine Qazaqstan Kom­mýnıstik halyq partııasynan kandıdat, QKHP Ortalyq komıtetiniń hatshysy Turǵyn Syzdyqov Astana qalasynda Eýrazııa gýmanıtarlyq ýnıversıtetiniń bir top stýdentimen kezdesti. «Búgin batystyq qundylyqtar rýhanı quldyraýǵa, adamgershilik bosókpelikke, jeńil paıda tabý men arsyzdyqqa alyp kelýde. Batys elderinde birinshi orynǵa ózimshildik shyǵyp otyr jáne ol qalypty ómir ustanymyna aınalǵan. Osynyń barlyǵy qaıǵyly jaǵdaılarǵa alyp kelýde: osy elderde jalǵyzilikti qart kisiler sany ýaqyt ótken saıyn óse túsip otyrsa, is júzinde týý kórsetkishi jylma-jyl tómendeýimen erekshelenedi», dep atap ótti óziniń sózinde Turǵyn Ys­qaquly. Qazaqstan Respýblıkasy prezı­dent­tigine kandıdat T.Syzdyqov, sondaı-aq, kezdesýge qatysýshylar nazaryn, búginde óziniń pikirinshe, jasandy murattardy nasıhattaıtyn batystyq buqaralyq mádenıettiń teris yqpal etetin saldarlaryna aýdardy. «Batystyq kınematograftyń ónim­deri is júzinde irip-shiritetin qaǵı­dattardy aldyńǵy kezekke shyǵarady. Qundylyqtardyń osyndaı oryn almasýlary eshqandaı joǵary mán-maǵynasy joq  beımaral ádemi ómirge bas ııýshilikti nasıhattaıdy. Al munyń shynaıy ómirge úsh qaınasa sorpasy qosylmaıdy», dedi óziniń sózinde Qazaqstan Kommýnıstik halyq partııasynan prezıdenttik saılaýǵa túsip jatqan Turǵyn Ysqaquly. Prezıdenttikke kandıdattyń pikirinshe, gollıvýdtyq kıno ónimderi qandaı jolmen bolsa da tabysqa qol jetkizý maqsatynda esh nárseden taıynbaıtyn keýdemsoqtyq qaǵıdattaryn barlyq basqa qundylyqtardan joǵary qoıady. Al Gollıvýd kınolaryndaǵy qatygezdik joǵary ıdealdar deńgeıine deıin áspettelse, ol shynaıy ómirde eshqandaı jaza tartpaıdy deıtin ótirik bir eles qalyptastyrady. T.Syzdyqov atap ótkendeı, barlyq batystyq fılmderde ómir men adamǵa qatysty tutynýshylyq kózqaras nasıhattalady. Bul nasıhattyń negizgi maq­saty adamdy qalypty ómir súrý úshin ózine qajettiden múmkindiginshe kóbirek qarpyp qalýǵa májbúrleý bolyp tabylady. Demek, budan shyǵatyn qorytyndy, deıdi prezıdenttikke kandıdat, basty qundylyq retinde rýhanı emes, materıaldyq baılyq aldyńǵy kezekke shyǵady. T.Syzdyqov, sonymen qatar, batys­tyq tamaqtaný mádenıetiniń teris yqpaly máselelerine toqtalyp ótti. «Bir qaraǵanda fast-fýd óte yńǵaıly jáne únemdi tamaq retinde kórinedi. Biraq búginde ondaı taǵamnyń adam aǵzasyna qandaı zııan tıgizetinin oılanatyn ýaqyt jetti. Fast-fýd sııaqty taǵam túrlerin daıyndaýǵa jáne satýǵa  qurylǵan bıznes onyń ıelerine arzan da tómen sapaly ónim esebinen jaqsy tabys ákeledi. Onyń ústine, mundaı zııandy azyq keń kólemde jarnamalanyp, tutynýshyǵa tyqpalanady dese de bolady», dep atap ótti óziniń sózinde Turǵyn Ysqaquly. Eýrazııa gýmanıtarlyq ýnıver­sıte­tiniń bir top stýdentimen kezdesý bary­synda, kandıdattyń saılaý­aldy shta­bynyń jetekshisi Aıqyn Qońy­rov ta sóz sóıledi. Atap aıtqanda, ol T.Syzdyqovtyń saılaýaldy baǵdar­la­masynda kóterilip otyrǵan máseleler egjeı-tegjeıli zerttelgenin jáne jan-jaqty oılastyrylǵanyn málimdedi. «Búginde eki tarap úshin de óte jemisti kezdesý boldy ǵoı dep oılaımyn. Biz Turǵyn Ysqaquly batystyq stan­darttar men qundylyqtardyń teris yqpaly máselelerin oryndy kóterip otyr dep esepteımiz. Bizdiń túrli óńirlerde áli birqatar kezdesýler ótki­zýimiz josparlanǵan. Sol kezdesýlerde biz jurtshylyqtyń nazaryn, sony­men qatar, kompıýterlik oıyndar men áleýmettik jelilerdiń zııandy yqpa­lyna aýdarýdy oılastyryp otyrmyz», dedi óziniń sózinde prezıdenttikke kandıdattyń saılaýaldy shtabynyń jetekshisi A.Qońyrov. Kezdesý qorytyndysynda Qazaqstan Respýblıkasy prezıdenttigine kandıdat Turǵyn Syzdyqov stýdentter tarapynan qoıylǵan keıbir suraqtarǵa jaýap qaıtaryp, óziniń saılaýaldy shtabynyń ári qaraıǵy jumys josparlary týraly áńgime qozǵady. Jaqsybaı SAMRAT, «Egemen Qazaqstan». ASTANA.