Qazaqstan fýtboldan álem chempıonatyn ótkizýden úmitti

ASTANA. 1 sáýir. Qazaqstan fýtbol federasııasynyń prezıdenti Erlan Qojaǵapanov Reseıge jasaǵan issaparynda FIFA prezıdenti Iozef Blattermen kezdesti. Sondaı-aq, Reseı aqparat quraldaryna suhbat berip, Qazaqstannyń fýtboldan 2026 jylǵy álem chempıonatyna úmitker retinde qatysýdy josparlap otyrǵanyn aıtty. Bul týraly «Sport-Ekspress» habarlady. Atalǵan basylymǵa bergen suhbatynda ol: «Aldaǵy ýaqytta álem chempıonatyn ótkizý úshin talasqa túsý josparymyzda bar. Qazir osy maqsatta el basshylarymen aqyldasyp, óz múmkindigimizdi saralap jatyrmyz. Elimizdiń damý qarqyny óte joǵary, ekonomıkamyz da turaqty túrde alǵa jyljyp keledi. Endeshe nege talasyp kórmeske? Biz 2022 jyly qysqy Olımpıadany ótkizgimiz keledi. Al odan keıingi josparda 2026 jylǵy fýtboldan álem chempıonaty tur», – dedi. Sonymen qatar Erlan Toqtarhanuly fýtbol federasııasynyń búgingi bıýdjetin de jarııalady. Bul jóninde ol: «Qazir bizdiń federasııanyń bıýdjeti shamamen 10 mıllıon eýrony quraıdy. Onyń ishinde ózimizdiń jáne ÝEFA beretin qarjy da bar», – dedi. Odan bólek, Federasııa prezıdenti qazaq fýtbolynyń ÝEFA-ǵa múshe bolýyna toqtalyp: «Fýtbolymyzdyń Eýropaǵa qosylǵanyna esh ókinbeımiz. Bul otandyq fýtbolshylardyń kásibı deńgeıde ósýine mol múmkindik beredi. ÝEFA bizge óte kóp kómek kórsetip otyr» – dedi. Elaman Qońyr. Derek, sýret: «Sport-Ekspress».