ASTANA. 25 tamyz. Búgin bas prokýror Ashat Daýylbaev TMD elderiniń bas prokýrorlary úılestirý keńesiniń (TMD BPÚK) 25-jınalysy sheńberinde osy uıymnyń atqarýshy hatshysy Leonıd Ermolaevpen kezdesti. Bul týraly Bas prokýratýranyń baspasóz qyzmeti habarlady.
Kezdesý barysynda josparlanyp otyrǵan jınalystyń kún tártibi talqylandy. Bul jıyn mereıtoılyq bolyp tabylady jáne TMD elderiniń bas prokýrorlary úılestirý keńesiniń qurylǵanyna 20 jyl tolýyna arnalady.
Taraptar forým barysynda talqylaýǵa usynylatyn máselelerdiń mańyzdylyǵyna nazar aýdardy. Sondaı-aq, bas prokýror TMD aýmaǵynda qylmyspen, terrorızmmen jáne ózge de zorlyq ekstremızmniń kórinisterimen, esirtki zattarynyń, psıhotroptyq zattar men olardyń prekýrsorlarynyń zańsyz aınalymymen, adam saýdasymen kúres máseleleriniń ózektiligin erekshe atap ótti.
Basqosýda TMD elderiniń bas prokýrorlary úılestirý keńesiniń 2014-2018 jyldarǵa arnalǵan jumys josparynyń oryndalý máseleleri sóz boldy.
TMD BPÚK 1995 jylǵy 7 jeltoqsanda qurylǵan. 2000 jylǵy 25 qańtardaǵy TMD qatysýshy-memleketteriniń memleket basshylary keńesiniń sheshimimen oǵan TMD memleketaralyq organy mártebesi berilgen. Osy qujatqa Ázerbaıjan, Armenııa, Belarýs, Grýzııa, Qazaqstan, Qyrǵyzstan, Moldova, Reseı, Tájikstan jáne Ýkraına qol qoıǵan.
Elaman Qońyr.
Derek, sýret: Bas prokýratýranyń baspasóz qyzmeti.
