Berdibek Saparbaev Ońtústik Qazaqstanǵa bardy

ShYMKENT. 20 mamyr. Premer-Mınıstrdiń orynbasary Berdibek Saparbaev Ońtústik Qazaqstan oblysyna jumys saparymen bardy. Bul týraly 24.kz telearnasyna silteme jasap, egemen.kz tilshisi habarlady. Sapar barysynda Úkimet basshysynyń orynbasary óndiris oryndary men áleýmettik mekemelerdi aralap, jurtshylyqpen kezdesti. Oblysta áleýmettik salany qarjylandyrýǵa bıýdjettiń 65,1 paıyzy jumsalady. О́ńirdegi densaýlyq saqtaý salasyn damytýǵa 5 jyldan astam ýaqyt buryn 500 nysan qajet bolsa, búginde sonyń 310-y salyndy. Bıyl taǵy 25-iniń qurylysy júrýde. Materıaldyq-tehnıkalyq jaǵdaı jaqsarǵan soń, adamdardyń ómir súrý jasy da uzardy. Sondaı-aq, týberkýlez ben onkologııalyq aýrýlarǵa shaldyqqandar qatary da kúrt azaıǵan. Oblystyq densaýlyq saqtaý basqarmasynyń basshysy Seıitjamal Pakeev aıtýynsha, áıelder ólimi – 2,2, bala ólimi 1,2 paıyzǵa tómendegen. Aımaqta jyl basynan beri 24 mekeme óz jumysshylaryna 109 mıllıon teńgeden astam jalaqy qaryz bolǵan. Sonyń 98 paıyzy tólendi. Sonymen qatar, Berdibek Saparbaev №1 Shymkent qalalyq balalar aýrýhanasy men 75 ga. aýmaqty alyp jatqan «Qazyna» etno-tarıhı kesheninde boldy. Keshende Saparbaev Qazaq handyǵynyń 550 jyldyǵyna arnalǵan monýmentaldy eskertkishpen tanysyp, oblystyq tarıhı-ólketaný murajaıyn aralady. Baqtııar Taıjan. Derek, sýret: 24.kz.