ELBASY TÝRALY EREN KITAP

Elbasy bedeli – el bedeli. Osy turǵydan qa­raǵanda, bul kúnderde biz el bedelin bıik­tetetin taǵy bir mereıli oqıǵaǵa kýá bolǵaly turmyz. Máskeýdiń «Mejdýnarodnye otnoshenııa» baspasynan reseılik belgili jazýshy Sergeı Plehanovtyń Nursultan Nazarbaevtyń ómirine arnalǵan «Jibekteı esilmegen jol» («Ne shelkovyı pýt») atty kitaby jaryq kórdi. Kitaptyń annotasııasynda bylaı delingen: «Táýelsiz Qazaqstannyń Tuńǵysh Prezıdentiniń qalyptasýy Keńes Odaǵynyń órkendeýimen jáne quldyraýymen, jańa táýelsiz memleketterdiń týyndaýymen qosa júrgen oqıǵalarmen baılanystyra berilgen. Nursultan Nazarbaevtyń ómiri men eńbek joly kóp jaǵdaıda burynǵy saıası júıeni jańǵyrtýdy qoldaǵan keńes basshylyǵynyń sol kezdegi toptaryna tán. Biraq qaıta qurý kezeńindegi kóptegen reformatorlarǵa qaraǵanda Nazarbaev o bastan kúıretýge emes, jasampazdyqqa baǵyt ustandy. Elde ornyqty tatýlyq pen turaqtylyqty qamtamasyz ete otyryp, ol qazirgi zamanǵy tabysty memleketti qurdy. KSRO-nyń burynǵy respýblıkalarymen tyǵyz baılanystardy saqtaı otyryp, Qazaqstan Shyǵystyń jáne Batystyń sheshýshi elderimen ózara tıimdi áriptestik qarym-qatynastar ornata bildi. Semeı ıadrolyq polıgonynyń jabylýy jáne halyqaralyq beıbitshilik jolyndaǵy bastamalardaǵy Nazarbaevtyń róli ony qazirgi zamannyń belgili jáne bedeldi saıası qaıratkerine aınaldyrdy. Orys jazýshysy Sergeı Plehanovtyń Nursultan Nazarbaev týraly – adam jáne saıasatker týraly – kitabymen «Mejdýnarodnye otnoshenııa» baspasy «Mırovye lıdery» serııasyn ashyp otyr». Búgin Máskeýde atalǵan kitaptyń tusaý­keseri ótedi. Soǵan oraı «Egemen Qazaqstan» gazeti S.Plehanovtyń «Jibekteı esilmegen jol» atty 480 bettik kitabynan alynǵan keıbir úzin­dilerdi gazettiń 6-betinde oqyrmandar nazaryna usynyp otyr. Kitap tusaýkeseriniń qalaı ótkeni, Elba­symyz jaıyndaǵy jańa eńbektiń Reseıdiń zııaly qaýymyna qalaı áser etkeni týraly Máskeýge arnaıy jiberilgen tilshimizdiń taıaý kúnderde jarııalanatyn maqalasynan oqı alasyzdar.