Jeńis kúnine oraı Aqtaýdy bezendirýge 2,1 mln. teńge jumsalady

AQTAÝ. 6 naýryz. Jeńis kúnine oraı Aqtaý qalasyn bezendirý jumystaryna jergilikti bıýdjetten 2,1 mln. teńge qarastyrylǵan. Bul týraly egemen.kz tilshisi habarlady. Osy qarjyǵa Aqtaýdy Jeńis meıramyna bezendirýden bólek, mańǵystaýlyq batyrlar men qazirgi kózi tiri ardagerlerimizdiń sýretterin qala kóshelerine, LED ekrandar men tablolarǵa ornalastyrý, sondaı-aq, «Máńgilik alaý» monýmentiniń janynan Jeńistiń 70 jyldyǵyna arnap arnaıy barelef ornatý kózdelgen. «Birinshi barelefke maıdan alańy beınelense, ekinshi barelefke tyl beınelenetin bolady. Sebebi, Jeńiske maıdandaǵy áskerı kúshpen birge, tyldaǵy eren eńbek te úles qosty. Sonymen qatar, mańǵystaýlyq Keńes Odaǵynyń Batyrlary Mádı Begenov, Jumaǵalı Qaldyqaraev, Bilál Qalıev, «Dańq» ordeniniń ıegerleri Kemer Ońǵalbaev, Pavel Malaev, Lenın ordendi Isataı Súıeýbaev pen Qartbaı Bekjanovqa arnaıy eskertkishter ornatylatyn bolady», deıdi Aqtaý qalasynyń ákimi Edil Jańbyrshın. Aqtaýda sońǵy eki jylda 8 soǵys ardageri memlekettik turǵyn úı qorynan baspanaly bolǵan, qazir Aqtaý qalasy boıynsha turǵyn úı kezeginde turǵan bir de bir ardager joq. Aqtaý qalasy ákiminiń aıtýynsha, páterleri jóndeýdi qajet etetin ardagerlerdiń úılerine jóndeý jumystaryn júrgizý qolǵa alynǵan. Mereke qarsańynda arnaıy «Ardagerlerge kómek» atty jastardyń áleýmettik kómek komandasy jasaqtalyp, jastar ardagerlerdiń úıi-sharýasyna kómektesip, kúndelikti turmystaǵy jumystaryna qolǵabys jasamaq. – Jaz maýsymynda tilek bildirip otyrǵan kásipkerlerdiń kómegimen ardagerlerdiń densaýlyǵyn ońaltý boıynsha naqty sharalar qabyldaıtyn bolamyz. Iаǵnı, ardagerlerdi respýblıkamyzdyń emdeý-saýyqtyrý ortalyqtaryna jiberemiz. Al qazir oblystyq densaýlyq saqtaý basqarmasymen birlesip tez arada ardagerlerdiń densaýlyǵyna tolyq tekserý jasaýymyz kerek. Soǵys ardagerleri aýrýhana, emhana jaǵalap júrmeýi úshin arnaıy mobıldi top jasaqtap, qarııalardyń úılerine baryp, densaýlyqtaryn tekseretin bolamyz, – deıdi qala ákimi. 1 naýryzdan bastap barlyq bilim berý uıymdarynda, mektepter men balabaqshalarda Jeńis kúnine arnalǵan «Erlik sabaqtaryn», «Beıbitshilik sabaqtaryn» jáne «Eske túsirý saǵattaryn» ótkizý qolǵa alynsa, sáýir aıynda pankratıonnan qalalyq ashyq birinshilik ótkizý josparlanǵan. Atalǵan birinshilikke Atyraý, Aqtóbe, Oral, Qyzylorda oblystarynyń komandalary qatysady dep kútilýde. Al qazan aıynda «Jaýynger, seniń erligiń óshpeıdi!» atty oqý oryndary stýdentteriniń teatrlandyrylǵan kórmeleriniń baıqaýy uıymdastyrylmaq. Gúlaıym Shyntemirqyzy. Derek: egemen.kz. Sýret: tumba.kz.