Jýrnalısterge Qaraǵandynyń 3D-maketi kórsetildi

QARAǴANDY. 6 naýryz. Keshe buqaralyq aqparat quraldarynyń ókilderine Qaraǵandy qalasynyń 3D-maketi kórsetildi. Bul týraly egemen.kz habarlady. Osyǵan arnalǵan kórme Kenshiler mádenıet úıiniń ekinshi qabatyndaǵy bıshiler zalynan oryn aldy. Munda kez kelgen tilek bildirýshi kelip, qalanyń jańa maketimen tanysa alar edi. Qaraǵandynyń 3D-maketi qalanyń burynǵy ákimi Meıram Smaǵulovtyń ıdeıasy boıynsha jasaldy. Mundaı keń aýqymdy kartany ol Astanada bolǵanynda kórgen eken. Sol joly dýanbasy dál osyndaı maketti kenshiler kentinde de jasaýdyń kerektigine oı túıip qaıtady. Sondyqtan oǵan 30 mln. teńge qarjy bóldirip, qala qurylysy kadastry ortalyǵyna maket daıyndaýǵa tapsyrys beredi. Jumys toǵyz aı boıy júredi. «Maket úshin negiz jasaý ońaı bolǵan joq, - dep moıyndaıdy qazir «Qala qurylysy kadastry ortalyǵy» JShS dırektory Tımýr Aýjanov. – Men bul jerde Qaraǵandynyń 1:2000 masshtabty kartasyn jasaýdyń qıyn bolǵanyn aıtyp otyrmyn. Sebebi, joldary men úıleri kórsetilgen mundaı aýqymdaǵy karta buryn qalada bolmaǵan. Sondaı-aq qala aýdandaryn bir-birimen jalǵap, koordınattaryn saqtap qalý ońaı bolǵan joq. Atap aıtqanda, Maıqudyq pen Ońtústik-Shyǵys aýdandy qalanyń ortalyǵymen baılanystyrýǵa qatysty biraz jumystar jasaýǵa týra keldi». Atap ótý kerek, qalanyń Prıshahtınskiden basqa bólikteriniń bári maketke engizilgen eken. Dırektordyń sózine qaraǵanda, bul osy aýdannyń jańa jobasynyń jasalyp jatýyna baılanysty bolǵan. Al keleshekte ol qala kartasy men maketine tolyq qosylady. Qala ákimi Nurlan Áýbákirov shahardyń áli de óse túsetinin, onda kóptegen jańa ǵımarattar paıda bolatynyn aıtty. Aıta keteıik, 3D-maketiniń kólemi 11x17 metrdi quraıdy. Onda úıler men qurylystardyń 185 myń kishireıtilgen kóshirmeleri ornalastyrylǵan. Maket 9 naýryz kúniniń sońyna deıin Kenshiler mádenıet úıinde kórme retin turady. Aıqyn Nesipbaı. Derek, foto: Qaraǵandy qalalyq ákimdigi.