Atyraýda qalta urylary ustaldy

ATYRAÝ. 6 naýryz. Atyraýda qoǵamdyq kólikterde oryn alatyn qalta urlyǵynyń aldyn alýǵa baılanysty «Qalta urlyǵy» jedel-aldyn alý sharasy ótkizilip jatyr. Bul týraly egemen.kz tilshisi habarlady. Atalǵan shara aıasyndaǵy jumystardyń alǵashqy nátıjeleri baıqala bastady. Atyraý oblystyq ishki ister departamentiniń baspasóz hatshysy Gúlnazıra Muhtarovanyń málim etýinshe, 5 naýryzda №14 baǵyttaǵy avtobýsta qalta urlyǵyn jasaǵan 18 jasar jigit ustalǵan. Atyraý qalalyq krımınaldyq polısııa bóliminiń qyzmetkerleri bultartpas aıǵaqpen ustalǵan jigitten ishinde 20 myń teńgesi bar ámııandy taýyp alǵan. Qalta urlyǵyna áýestengen jigitten jaýap barysynda onyń buǵan deıin de birneshe ret qoǵamdyq kólikterde urlyq jasaǵany belgili boldy. Muny ustalǵan jigittiń ózi moıyndap, dálel retinde «Nasıha» saýda ortalyǵyna taıaý ornalasqan kóp qabatty úıdiń jertólesine jasyrylǵan zattaı aıǵaqtardy óz erkimen kórsetip bergen. Ol jerden zardap shegýshilerdiń túrli qujattary, sonymen birge, 10 ámııan tabylǵan. Dál osyndaı jeńil jolmen tabys tabýdy kózdep, №12 baǵytta qatynaıtyn qoǵamdyq kólikke mingen jolaýshylardyń ámııan urlaýmen aınalysyp júrgen taǵy bir «sýyq qoldyny» ustaldy. Ol atalǵan qoǵamdyq kólikte eki jolaýshynyń ámııanyn urlaǵan. Muny polıseıler urydan tárkilengen áımıandar ishindegi jábirlenýshilerdiń qujattary negizinde dáleldep berdi. Keıin belgili bolǵandaı, 26 jastaǵy jigit buǵan deıin eki ret osyndaı urlyq jasaǵany úshin sottalǵan eken. Qazir atalǵan faktiler boıynsha tergeý-tekserý amaldary júrgizilip jatyr. Joldasbek Shópeǵul. Derek: Atyraý oblystyq ishki ister departamenti. Sýret: next87.livejournal.com.